मध्य विभाग आणि पूर्व विभाग यांच्यातील दुलीप ट्रॉफीचा सामना चांगलाच थरारक झाला. प्रथम फलंदाजी करताना मध्य विभागचा संघ 266 धावांवर सर्व बाद झाला. प्रत्युत्तरात, पूर्व विभागाची सुरुवात एकतर्फी वाटत होती, पण एकही फलंदाज न गमावता 161 धावा केल्यानंतर पूर्व विभागाची फलंदाजी अचानक कोसळली आणि पुढच्या 105 धावांत त्यांचे सर्व फलंदाज बाद झाले, ज्यामुळे संपूर्ण संघ 266 धावांवर सर्व बाद झाला. वैभव सूर्यवंशीच्या धडाकेबाज फटकेबाजीनंतरही त्यांच्या संघावर ही अवस्था आली.
वैभवची स्फोटक सुरुवात
पूर्व विभागाला स्वप्नवत सुरुवात करून देण्याचे श्रेय त्यांचा युवा सलामीवीर वैभवला जाते. वैभवने मैदानाच्या सर्व बाजूंनी चौकार आणि षटकारांची आतिषबाजी करत मध्य विभागाच्या गोलंदाजांची धुलाई केली. त्याने 84 चेंडूंमध्ये 109.52 च्या स्ट्राईक रेटने 92 धावा केल्या, ज्यामध्ये 12 चौकार आणि 3 उत्तुंग षटकारांचा समावेश होता. दुसऱ्या टोकाकडून त्याला साथ देणाऱ्या कुमार कुशाग्रनेही सुरेख फटकेबाजी करत 79 चेंडूंमध्ये 10 चौकार आणि 1 षटकारासह 67 धावांची शानदार खेळी केली. दोघांनी मिळून 161 धावांची भक्कम शतकी भागीदारी रचली आणि पूर्व विभागाला फ्रंटफूटवर आणले.
161 वरून 266 पर्यंत घसरण
जेव्हा पूर्व विभाग एक मोठी धावसंख्या उभारण्याच्या तयारीत होता, तेव्हाच त्यांना 161 धावांवर वैभव सूर्यवंशीच्या रूपाने पहिला धक्का बसला. तो बाद झाल्यावर संघाच्या पडझडीला सुरुवात झाली. पूर्व विभागाची धावसंख्या ढासळू लागली आणि मधल्या फळीतील फलंदाज मैदानात येताच आपल्या विकेट्स गमावू लागले. रियान परागने थोडा संघर्ष करत 29 धावा केल्या, पण दुसऱ्या टोकाकडून एकाही फलंदाजाने त्याला साथ दिली नाही. त्यामुळे एकेकाळी मजबूत स्थितीत असलेला संघ 266 धावांवर गारद झाला आणि पहिल्या डावात दोन्ही संघांनी समान धावा केल्या.
मध्य विभागाच्या गोलंदाजी कामगिरी
मध्य विभागाच्या आकाश सेनगुप्ताने सर्वात घातक गोलंदाजी करत चार विकेट्स घेतले, तर मानव सुथारने तीन फलंदाजांना बाद करत पूर्व विभागाच्या मधल्या फळीचा कणा मोडला. आदित्य ठाकरेने दोन आणि हर्ष दुबेने एक बळी घेतला.
