बांकुरा लोकसभा मतदारसंघाचे तृणमूल काँग्रेसचे खासदार अरूप चक्रवर्ती यांच्याविरोधातील प्रकरण लोकपालने गुणवत्तेअभावी फेटाळल्यानंतर तृणमूल काँग्रेसचे खासदार अभिषेक बॅनर्जी यांनी भाजपवर निशाणा साधला आहे. अरूप चक्रवर्ती यांनी काही महिन्यांपूर्वी तृणमूल काँग्रेस सोडून बंडखोर गटात प्रवेश केल्यानंतर हे प्रकरण फेटाळण्यात आल्याचा दावा अभिषेक बॅनर्जी यांनी केला.
अभिषेक बॅनर्जी यांनी ‘एक्स’वर पोस्ट करत केंद्रातील भाजप सरकारवर टीका केली. “पंतप्रधान मोदींच्या नव्या हिंदुस्थानातील महान मशीन युगात स्वागत आहे,” असे म्हणत त्यांनी भाजपमध्ये जाणाऱ्या नेत्यांसाठी ‘वॉशिंग मशीन’ तयार असते, तर आपल्या भूमिकेवर ठाम राहणाऱ्यांविरोधात ‘क्रशिंग मशीन’ सुरू होते, असा आरोप केला. भाजपच्या गोटात जाणाऱ्या नेत्यांना तातडीने दिलासा मिळतो, असा दावाही त्यांनी केला.
अरूप चक्रवर्ती यांच्याविरोधातील प्रकरण लोकपालने नुकतेच गुणवत्तेअभावी फेटाळले. यापूर्वी सीबीआयने 28 ऑगस्ट रोजी केलेल्या प्राथमिक चौकशीत अरूप चक्रवर्ती यांच्याविरोधात करण्यात आलेले सहाही आरोप सिद्ध झाले नसल्याचे नमूद केले होते. याच पार्श्वभूमीवर अभिषेक बॅनर्जी यांनी प्रतिक्रिया दिली आहे.
दरम्यान, तृणमूल काँग्रेसमधील अंतर्गत वादाच्या पार्श्वभूमीवर निवडणूक आयोगाने गुरुवारी दोन्ही गटांना मूळ ‘ऑल इंडिया तृणमूल काँग्रेस’ हे नाव आणि ‘फुले व गवत’ हे निवडणूक चिन्ह वापरण्यास मनाई केली होती. त्यानंतर शुक्रवारी आयोगाने दोन्ही गटांना स्वतंत्र नाव आणि निवडणूक चिन्ह दिले.
