चोरीच्या गुह्यात न्यायालयीन कोठडी सुनावल्यावर जेलमध्ये नेत असताना आरोपीने स्वतःवर ब्लेडने हल्ला केल्याची घटना माझगाव न्यायालय परिसरात घडली. याप्रकरणी भायखळा पोलिसांनी मोहंमद गौस पठाण विरोधात गुन्हा नोंद केला.
काळाचौकी पोलीस ठाण्यात चोरीचा गुन्हा दाखल आहे. त्या गुह्यात पोलिसांनी मोहंमद पठाणला अटक केली होती.
त्याच्या पोलीस कोठडीची मुदत संपत होती. त्यामुळे त्याला माझगाव येथील न्यायालयात हजर केले होते. त्याला 14 दिवसांची न्यायालयीन कोठडी सुनावली होती. त्यानंतर सायंकाळी पठाणला आर्थर रोड येथील तुरुंगात नेले जात होते. पोलिसांच्या पथकाने पठाणला ताब्यात घेतले. तेव्हा त्याने न्यायालय परिसरात गोंधळ घालण्यास सुरुवात केली. पोलिसांना शिवीगाळ करण्यास सुरुवात केली. पोलीस व्हॅनमध्ये बसण्यास पठाणने नकार दिला. मला सोडून द्या नाही तर तुम्हाला सोडणार नाही, अशी धमकी दिली. तसेच त्याने तोंडातून ब्लेड काढून स्वतःवर ब्लेडने हल्ला केला. ब्लेडने हल्ला केल्यावर त्याला जे. जे. रुग्णालयात दाखल केले.
