शहरातील कापड बाजार ते सर्जेपुरा रस्त्याच्या झालेल्या दुरवस्थेबाबत नगर शहर शिवसेना (उद्धव बाळासाहेब ठाकरे) पक्षाच्या वतीने सह्यांची मोहीम राबवून मनपा आयुक्तांना निवेदन देण्यात आले. महापालिकेने याबाबत तातडीने उपाययोजना केल्या नाही, तर तीव्र आंदोलन छेडण्यात येईल, असा इशारा शहरप्रमुख संभाजी कदम यांनी दिला आहे.
निवेदनात म्हटले आहे की, नगर शहराच्या मध्यवर्ती भागातील कापड बाजार ते सर्जेपुरा ते लालटाकी या रस्त्याची सध्या प्रचंड दुरवस्था झाली आहे. अनेक छोटे-मोठे अपघात या ठिकाणी होत आहेत. नगरच्या बाजारपेठेत जिह्यातून नागरिक खरेदीसाठी येत असतात. येथील रस्त्याच्या दुरवस्थेबाबत मनपाला वेळोवेळी निवेदने देऊनसुद्धा काही उपयोग झाला नाही. तरी या रस्त्याचे काम तातडीने सुरू करावे, असे निवेदनात म्हटले आहे.
संभाजी कदम म्हणाले, या भागातील दुकानदार, व्यापारी, रहिवासी मोठय़ा प्रमाणात मनपाचा कर भरत आहेत. परंतु मनपा येथील समस्यांकडे दुर्लक्ष करत आहे. कापड बाजार ते सर्जेपुरा ते लालटाकी रस्त्यांची अत्यंत दुरवस्था झाली आहे. याबाबत वेळोवेळी शिवसेनेने पाठपुरावा केला; परंतु कोणतीही कार्यवाही होत नाही. आता नागरिक व व्यापारी रस्त्यांवर उतरून सह्यांची मोहीम हाती घेऊन या विरोधात शिवसेनेच्या माध्यमातून आवाज उठविला आहे. याउपरही जर मनपाने काही उपाययोजना केल्या नाही तर यापेक्षा तीव्र आंदोलन केले जाईल, असा इशारा देण्यात आला आहे.
याप्रसंगी युवा सेना सहसचिव विक्रम राठोड, संजय शेंडगे, बाळासाहेब बोराटे, शाम नळकांडे, सचिन शिंदे, अमोल येवले, विजय पठारे, संतोष गेनप्पा, हर्षवर्धन कोतकर, रवि वाकळे, प्रशांत गायकवाड, दीपक खैरे, परेश लोखंडे, गौरव ढोणे, सुरेश तिवारी, अशोक दहीफळे, संदिप दातरंगे, दीपक भोसले, शाम कोके, अरुण झेंडे, मुन्ना भिंगारदिवे, अण्णा घोलप, बंटी खैरे, संतोष डमाळे, डॉ. श्रीकांत चेमटे, अभिजीत अष्टेकर आदींसह शिवसैनिक उपस्थित होते.
