पाकिस्तानी क्रिकेट संघाचा दिग्गज खेळाडू शोएब मलिक T20 फॉरमॅटमध्ये पुनरागमन करण्याच्या तयारीत आहे. शोएब मलिक म्हणाला की, मला अजूनही T20 फॉरमॅटमध्ये पाकिस्तान संघाकडून खेळायचे आहे. मी 42 वर्षांचा आहे, पण मी 25 वर्षांच्या खेळाडूशी स्पर्धा करू शकतो. मी अद्याप निवृत्तीचा विचार केलेला नाही.
शोएब मलिक 1 फेब्रुवारी रोजी 42 वर्षांचा होणार आहे, त्याने कसोटी आणि एकदिवसीय सामन्यांमधून निवृत्ती घेतली आहे, परंतु आंतरराष्ट्रीय T20 मधून त्याने अद्याप निवृत्ती घेतलेली नाही. शोएबने नोव्हेंबर 2021 मध्ये बांगलादेशविरुद्ध पाकिस्तानकडून शेवटचा T20 आंतरराष्ट्रीय सामना खेळला होता. मात्र तेव्हापासून त्याची संघात निवड झाली नाही. शोएब मलिक अनेक T20 लीग खेळत असून त्यामध्ये त्याला भरपूर यश मिळत आहे.
बांगलादेश प्रीमियर लीगच्या एका सामन्यादरम्यान, तो म्हणाला की, “जरी मी संघातील सर्वात जुना खेळाडू असलो तरी, तुम्ही माझ्या फिटनेसची तुलना एका 25 वर्षीय खेळाडूशी करू शकता. मी अजूनही खेळाचा आनंद घेतो आणि मला अजूनही वाटते की मला खेळाची भूक आहे आणि जोपर्यंत या दोन गोष्टी आहेत तोपर्यंत मी क्रिकेट खेळत राहीन. म्हणूनच मी आत्ता निवृत्तीचा विचारही करत नाही. मला जिथे संधी मिळेल तिथे मी माझी सर्वोत्तम खेळी दाखवून देईन.”
