कर्णधार श्रेयस अय्यरच्या बॅटने पेट घेतला आणि विंडीजच्या 171 धावांचे आव्हान क्षणात फिके पडले. अय्यरच्या झंझावाती नाबाद शतकाच्या जोरावर हिंदुस्थानने पहिल्या टी-20 सामन्यात विंडीजचा 32 चेंडू आणि आठ विकेट राखून धुव्वा उडवला. अवघ्या 14.4 षटकांत लक्ष्य गाठत हिंदुस्थानने मालिकेत 1-0 अशी आघाडी घेतली. 43 चेंडूंत नाबाद 102 धावा करणाऱया अय्यरने आज लखनौत नवाबी थाटात फलंदाजी करताना टी-20 क्रिकेटमध्ये सलग दहाव्या विजयाची नोंद केली आणि विजयादशमीही साजरी केली.
विंडीजचे 172 धावांचे लक्ष्य दिसायला आव्हानात्मक वाटत होते, त्यातच अभिषेक शर्मा आणि संजू सॅमसन हे फटकेबाज चौथ्या षटकातच बाद झाल्यामुळे हे आव्हान आणखी आव्हानात्मक झाले. पण सुरुवातीच्या या सावध पवित्र्यानंतर ईशान किशन मैदानात उभा असताना श्रेयसच्या फटक्यांनी लखनौच्या क्रिकेटप्रेमींच्या चेहऱयावर आश्चर्याची लकेर उमटवली. अय्यरची नजर खेळपट्टीवर अशी स्थिरावली की, त्यानंतर विंडीजच्या गोलंदाजांना चेंडू टाकण्यापेक्षा तो कुठे जाईल याचा अंदाज घेण्यातच अधिक वेळ गेला. त्याने 42 व्या चेंडूवरच शतक साजरे करताना सहा षटकार आणि चौकार खेचत अवघे एकाना स्टेडियममध्ये फटक्यांची आतषबाजी केली. त्याला ईशानने 37 धावांची साथ दिली, पण दोघांनी 137 धावांची अभेद्य भागी रचत मोठय़ा विजयावर शिक्कामोर्तब केले. विंडीजच्या गोलंदाजांना चांगल्या सुरुवातीनंतर अय्यर-ईशानला रोखण्यात अपयश आले आणि तेथेच हा सामना त्यांच्या हातातून निसटला.
त्याआधी अय्यरने नाणेफेक जिंकून प्रथम गोलंदाजी स्वीकारल्यानंतर हिंदुस्थानने विंडीजला सुरुवातीपासून मोकळे होऊ दिले नाही. विंडीजचा डाव एका टप्प्यावर बिनबाद 38 असताना अचानक 3 बाद 44 असा अडचणीत आला. अवघ्या 6 धावांत 3 फलंदाज बाद झाल्यामुळे त्यांची मोठय़ा धावसंख्येची आशा धूसर दिसू लागली. तेव्हा कर्णधार शाई होपने डावाला आधार दिला. त्याने 37 चेंडूंत सहा चौकार आणि दोन षटकारांसह 52 धावा केल्या. त्यानंतर शरफेन रदरपर्ह्डने आक्रमक पवित्रा स्वीकारत 34 चेंडूंत 56 धावा फटकावल्या. सहा चौकार आणि तीन षटकारांनी सजलेल्या त्याच्या खेळीमुळे विंडीजने धावसंख्या सावरली. मात्र हिंदुस्थानी गोलंदाजांनी अखेरच्या टप्प्यात पुन्हा मुसंडी मारली. पदार्पणवीर नमन धीरने तीन विकेट घेत विंडीजच्या मधल्या फळीला हादरे दिले. अक्षर पटेलने दोन विकेट घेत त्याला साथ दिली. परिणामी विंडीजचा डाव 19.1 षटकांत 171 धावांवर संपुष्टात आला. होपने आपल्या फलंदाजीतील सातत्य कायम राखताना रदरपर्ह्डच्या साथीने 63 धावांची भागी केली. त्यानंतर हिंदुस्थानच्या गोलंदाजांनी विंडीजच्या फलंदाजीला 5 चेंडू आधीच संपवले. परिणामतः विंडीजच्या डावाला दोनशेच्या आत रोखण्यात कुलदीप यादव आणि नमन धीरला यश लाभले.
