महाराष्ट्राचे अन्न आणि औषध प्रशासन (एफडीए) आयुक्त तुकाराम मुंढे यांनी आपली कोणतीही बदली झालेली नसल्याचे स्पष्ट केले आहे. आपल्या बदलीबाबत सुरू असलेल्या सर्व अफवा फेटाळून लावत त्यांनी असुरक्षित अन्न आणि निकृष्ट दर्जाच्या औषधांविरुद्धची धडक कारवाई अशीच सुरू राहणार असल्याचे सांगितले आहे. वारंवार होणाऱ्या बदल्यांमुळे चर्चेत असलेल्या या वरिष्ठ आयएएस अधिकाऱ्याच्या बदलीची चर्चा रविवारपासून जोर धरत होती. राज्य सरकारने त्यांची एमपीएससी परीक्षांमधील कथित पेपरफुटी आणि गैरव्यवहारांची चौकशी करण्यासाठी नेमलेल्या पाच सदस्यीय समितीच्या सचिवपदी नियुक्ती केली होती.
सोमवारी रात्री सोशल मीडिया प्लॅटफॉर्म एक्सवर पोस्ट करत मुंढे यांनी या सर्व अफवांना पूर्णविराम दिला. एफडीए आयुक्त पदावरून आपली कोणतीही बदली झालेली नसून आपण या पदावर कायम असल्याचे त्यांनी स्पष्ट केले. तसेच, असुरक्षित, निकृष्ट, भेसळयुक्त अन्न आणि बनावट औषधांविरुद्धची आमची लढाई सुरूच राहील, असा निर्धारही त्यांनी व्यक्त केला.
दरम्यान, नुकत्याच झालेल्या MPSC परीक्षांमधील कथित पेपरफुटी प्रकरणाच्या चौकशीसाठी मुख्यमंत्र्यांनी जाहीर केलेल्या पाच सदस्यीय समितीमध्ये मुंढे यांची सचिव म्हणून नियुक्ती करण्यात आली आहे. भरती प्रक्रियेतील त्रुटी आणि MPSC च्या कारभाराविरुद्ध विद्यार्थ्यांची आंदोलने झाल्यानंतर ही समिती स्थापन करण्यात आली आहे. ही समिती भरती मंडळाच्या माजी आणि वर्तमान अध्यक्षांच्या तसेच सदस्यांच्या कार्यकाळाची सखोल चौकशी करणार आहे.
पुण्यातील विद्यार्थी आंदोलन स्थगित
MPSC पेपरफुटी प्रकरणाची चौकशी होईपर्यंत आयोगाचे अध्यक्ष विवेक भीमनवार यांना सक्तीच्या रजेवर पाठविण्यात आले आहे. याचपार्श्वभूमीवर गेल्या 11 दिवसांपासून सुरू असलेले आंदोलन स्थगित करण्यात आले.
