साहित्यिकांचा बहिष्कार; नवे पाहुणे शोधताना आयोजकांची दमछाक

1

सामना प्रतिनिधी । यवतमाळ

नयनतारा सहगल यांच्या अपमानामुळे मान्यवर साहित्यिकांनी संमेलनावर बहिष्कार घातला. त्यामुळे नवे पाहुणे शोधताना आयोजकांची दमछाक होत आहे. उद्घाटनाच्या एक दिवस आधी सकाळी आठ वाजेपर्यंत पोस्टल मैदानावर संमेलन रद्द झाले तर बरे अशीच केविलवाणी अवस्था होती.

– कविसंमेलनाचे अध्यक्ष फ. म. शहाजिंदे, सुचिता खल्लाळ, सुहास जेवळीकर, नामदेव कोळी न आल्यामुळे ऐनवेळी अध्यक्ष शोधण्यासाठी आयोजकांना पळापळ करावी लागली.

– आज सकाळी 11 ते 12 या वेळेत सत्कारमूर्ती विद्या बाळ, चित्रकार भ. मा. परसकाळे न आल्यामुळे हा कार्यक्रम रद्द करण्यात आला. कृषक समाजाच्या परिसंवादाचे अध्यक्ष डॉ. शरद निंबाळकर, सहभाग घेणारे डॉ. रामप्रसाद तौर, चंद्रकांत वानखडे यांची अनुपस्थिती असल्याने हा कार्यक्रमही विस्कळीत झाला.

– त्यानंतरच्या ‘माध्यमांची स्वायत्तता’ यावर होणाऱया टॉक शोचा गिरीश कुबेर, ज्ञानेश महाराव, प्रा. जयदेव डोळे आणि समन्वयक संजय आवटे न आल्यामुळे फज्जा उडाला. नितीन केळकर यांनी किल्ला लढवण्याचा प्रयत्न केला असला तरी दुसऱ्या पाहुण्या अपर्णा मोहिले यांनी ऐनकेळी निरोप मिळाल्याने फार काही बोलता येणार नसल्याची कबुली देत आयोजकांची लक्तरे वेशीला टांगली.

– पुस्तक विक्रेत्यांकडे कार्यक्रम पत्रिका आहे परंतु या पत्रिकेतील बहुतेक मोठी मंडळी दिसत नसल्याने रसिकांचा हिरमोड झाला.

एक प्रतिक्रिया

  1. (कै) श्री बाळासाहेब ह्यांनी अशाच एका मराठी साहित्याशी संबधित कार्यक्रमाचे वेळी मराठीतील त्या काळातीलच नव्हे तर आजही ज्यांचे नाव मराठी वाचक आदराने घेतात काय संभावना केली होती हे आज तुम्ही विसरला असाल.ह्याच श्रीमती नयनतारा ह्यांनी ६-७ वर्षापूर्वी श्री नरेंद्र मोदी ह्यांना , त्यावेळी ते गुजरात राज्याचे मुख्य मंत्रिपद भूषवित होते त्यावेळी त्यांना परदेशात व्याख्यासाठी आमंत्रित केले होते ते खुद्द अमेरिकेत कोणालाही वावगे वाटले नव्हते तरीही भारतात स्वत:ला नामवंत,विचारवंत आणि अभिव्यक्ती स्वातंत्र्याचे खंदे समर्थक मानणाऱ्या सुमारे १५० जणांच्या कंपूत सामील होऊन अघोचरपणे सदर व्याख्यानाचे आमंत्रण रद्द करावे म्हणून ओरडा केला होता.आज आपण श्री मोदी द्वेषाची सणक मस्तकात भिनली असल्याने साहित्य संमेलन कसे ओस पडले आहे त्याचे वर्णन करत आहात अन्यथा आपणही आपल्या बंधुन्सारखी हे आमंत्रण का दिले असेच खणखणीत आवाजात रोख ठोक असते ह्यात शंका नाही !