मुंबईतील पवई परिसरातील विहार तलावात गुरुवारी दुपारी एक 19 वर्षीय तरुण बेपत्ता झाल्याची आणि बुडाल्याची भीती व्यक्त केली जात आहे. तरुणाचा शोध घेण्यासाठी शोधमोहीम राबवली जात आहे. मुंबई अग्निशमन दलाला घटनेची माहिती मिळाल्यानंतर दुपारी 3.18 च्या सुमारास ही घटना समोर आली. कैलास सोमन (19) बेपत्ता तरुणाचे नाव आहे. पवईतील फिल्टरपाडा परिसरातील विहार तलावात ही घटना घडली.
घटनेची माहिती मिळताच बचाव पथकांनी तात्काळ घटनास्थळी धाव घेत तलावात शोधमोहीम सुरू केली. घटनास्थळी मुंबई अग्निशमन दल, मुंबई पोलीस, 108 रुग्णवाहिका सेवा आणि बीएमसीच्या (BMC) कर्मचाऱ्यांना तैनात करण्यात आले आहे. बेपत्ता तरुणाचा शोध सुरू असून, पुढील तपशीलांची प्रतीक्षा असल्याचे अधिकाऱ्यांनी सांगितले.
