दुबईहून तेल अवीवच्या दिशेने जाणाऱया फ्लाय दुबई विमानात बुधवारी घडलेल्या प्रकाराची जगभरात चर्चा सुरू झाली आहे. काॅकपिटमध्ये दोन वैमानिकांमध्ये झालेली हाणामारी आणि एका वैमानिकाने सहवैमानिकाला चाकूने भोसकल्याचा प्रकार समोर आला असून हा सर्व प्रकार म्हणजे दुसरे ‘9/11’ घडवण्याचा कट होता, अशी शक्यता वर्तवली जात आहे.
34 हजार फूट उंचीवर विमान असतानाच काॅकपिटमध्ये पायलट व को-पायलट यांच्यात जोरदार भांडण झाले. पायलटने विमानातील को-पायलट स्मित मच्छार यांच्यावर जीवघेणा हल्ला केला. आक्रमक झालेल्या पायलटला आवरल्यानंतर हे विमान सौदी अरेबियामध्ये सुखरूप उतरवण्यात आले. कॅप्टन स्मित मच्छार यांना उपचारासाठी दुबईला हलवण्यात आले आहे.
इस्रायलवर हल्ल्याचा प्रयत्न
इस्रायलचे पंतप्रधान बिन्यामिन नेतान्याहू यांनी स्मित मच्छार यांचे कौतुक केले आहे. तसेच इस्रायलवरील संभाव्य हल्ला आणि विमानातील सर्व इस्रायली प्रवाशांच्या जीविताचे रक्षण केल्याचं श्रेय स्मित मच्छार यांना दिले जात आहे. पंतप्रधान नरेंद्र मोदी यांनीदेखील स्मित मच्छार यांनी ‘9/11’ सारखा हल्ला होण्यापासून रोखल्याचे म्हणत स्मित मच्छार या हिंदुस्थानी वंशाच्या वैमानिकाचे कौतुक केले आहे.
