एनडीएच्या उमेदवार द्रौपदी मुर्मू यांचा 15 व्या राष्ट्रपतीपदाच्या निवडणुकीत मोठा विजय झाला आहे. द्रौपदी मुर्मू यांनी निवडणूक जिंकताच हिंदुस्थानच्या सर्वात तरुण राष्ट्रपती म्हणून त्यांच्या नावावर पाच विक्रम झाले आहेत. देशातील सर्वोच्च पदावर पोहोचलेल्या द्रौपदी या पहिल्या आदिवासी नेत्या आहेत.
देशातील पहिले आदिवासी राष्ट्रपती
विद्यमान राष्ट्रपती राम नाथ कोविंद आणि के आर नारायणन यांच्या रूपाने देशाला दोन दलित राष्ट्रपती मिळाले आहेत. मात्र द्रौपदी मुर्मू या देशाच्या सर्वोच्च पदापर्यंत पोहोचलेल्या देशातील पहिल्या आदिवासी नेत्या आहेत. आजपर्यंत देशात एकही आदिवासी पंतप्रधान किंवा गृहमंत्री झाला नव्हता. ओडिशात जन्मलेल्या द्रौपदी मुर्मू या 2015 ते 2021 पर्यंत झारखंडच्या राज्यपाल होत्या. विशेष म्हणजे झारखंडमध्ये आपला कार्यकाळ पूर्ण करणाऱ्या त्या पहिल्या राज्यपाल होत्या.
सर्वात तरुण राष्ट्रपती
द्रौपदी मुर्मू यांचा जन्म 20 जून 1958 रोजी झाला. 25 जुलै रोजी त्यांचे वय 64 वर्षे 1 महिना आणि 8 दिवस असेल. द्रौपदी मुर्मू या आतापर्यंतच्या सर्वात तरुण राष्ट्रपती ठरणार आहेत. यापूर्वी हा विक्रम नीलम संजीव रेड्डी यांच्या नावावर होता. ते राष्ट्रपती झाले तेव्हा त्यांचे वय 64 वर्षे दोन महिने 6 दिवस होते. ते बिनविरोध अध्यक्ष झाले होते. त्याचवेळी, केआर नारायणन यांचे नाव सर्वात वयस्कर राष्ट्रपती बनलेल्यांमध्ये नोंदवले गेले आहे. वयाच्या 77 वर्षे 5 महिने 21 दिवसांनी ते राष्ट्रपती झाले होते.
स्वतंत्र भारतात जन्मलेले राष्ट्रपती
द्रौपदी मुर्मू या स्वतंत्र भारतात जन्मलेल्या पहिल्या राष्ट्रपती आहेत. विद्यमान राष्ट्रपती रामनाथ कोविंद यांचा जन्म 1 ऑक्टोबर 1945 रोजी झाला होता. 2014 पर्यंत जे पंतप्रधान आणि राष्ट्रपती बनले, ते सर्व स्वातंत्र्यापूर्वी जन्मलेले होते. पंतप्रधान मोदी यांचा जन्म 17 सप्टेंबर 1950 रोजी झाला. स्वतंत्र भारतात जन्मलेले ते पहिले पंतप्रधान आहेत.
ओडिशाचे पहिले राष्ट्रपती
देशात आतापर्यंत झालेल्या 14 राष्ट्रपतींपैकी 7 दक्षिण भारतातील होते. डॉ.राजेंद्र प्रसाद हे दोन वेळा राष्ट्रपती झाले आणि ते बिहारचे रहिवासी होते. या सर्वोच्च पदावर पोहोचलेल्या द्रौपदी मुर्मू या ओडिशाच्या पहिल्या नेत्या आहेत. त्या देशाच्या दुसऱ्या महिला राष्ट्रपती आहेत. 2007 मध्ये प्रतिभाताई पाटील या पहिल्या महिला राष्ट्रपती झाल्या होत्या.
नगरसेविका ते राष्ट्रपती
द्रौपदी मुर्मू या आधी नगरसेविका होत्या. त्या शिक्षिका देखील होत्या. त्या 1997 मध्ये नगरसेविका म्हणून निवडून आल्या. द्रौपदी मुर्मू या पहिल्या राष्ट्रपती बनल्या आहेत, ज्या नगरसेविका होत्या. त्यानंतर तीन वर्षांनी त्या विधानसभेत पोहोचल्या. ओडिशाच्या भाजप-बीजेडी सरकारमध्ये त्या दोनदा मंत्री होत्या. एखाद्या राज्याच्या राज्यपाल बनणाऱ्या त्या देशातील पहिल्या आदिवासी महिला होत्या.
