दापोली तालुक्यातील प्रसिद्ध असलेल्या उन्हवरे येथील गरम पाण्याच्या कुंडाला मुसळधार पावसामुळे आलेल्या पुराचा मोठा फटका बसला आहे. सलग कोसळणाऱ्या पावसामुळे दुथडी भरून वाहणाऱ्या उन्हवरे नदीचे पाणी थेट गरम पाणी कुंड परिसरात शिरल्याने हे ऐतिहासिक आणि धार्मिक महत्त्व असलेले पर्यटनस्थळ धोक्यात आले आहे. पुराच्या पाण्यामुळे परिसरात गाळ साचला असून स्थानिक नागरिक आणि पर्यटकांमध्ये चिंता व्यक्त केली जात आहे.
उन्हवरे गरम पाणी कुंड हे कोकणातील एक प्रसिद्ध पर्यटनस्थळ असून वर्षभर हजारो पर्यटक येथे भेट देतात. नैसर्गिक गरम पाण्याचे झरे, धार्मिक श्रद्धा आणि निसर्गरम्य परिसरामुळे या ठिकाणाला विशेष ओळख आहे. मात्र, गेल्या काही वर्षांपासून मुसळधार पावसाच्या काळात नदीला पूर आल्यावर कुंड परिसरात पाणी शिरण्याचे प्रकार वारंवार घडत आहेत. यंदाही नदीच्या पुराचे पाणी कुंडात घुसल्याने पर्यटनस्थळाच्या सुरक्षिततेबाबत गंभीर प्रश्न निर्माण झाले आहेत.
नदीपात्रात मोठ्या प्रमाणावर गाळ साचल्यामुळे नदीची पाणी वाहून नेण्याची क्षमता कमी झाली आहे. त्यामुळे पावसाळ्यात नदीला पूर आल्यावर पाणी थेट कुंड परिसराकडे वळते. ही परिस्थिती टाळण्यासाठी उन्हवरे नदीचे तातडीने गाळमुक्तीकरण करणे अत्यावश्यक असल्याचे ग्रामस्थांचे म्हणणे आहे.
यासोबतच नदीकाठी मजबूत संरक्षण भिंत (रिटेनिंग वॉल) उभारल्यास पुराच्या पाण्याचा वेग कमी होऊन कुंड परिसराचे संरक्षण होऊ शकते. अन्यथा दरवर्षी पुरामुळे पर्यटनस्थळाचे नुकसान होण्याची भीती व्यक्त केली जात आहे. यामुळे पर्यटकांच्या सुरक्षिततेचाही प्रश्न निर्माण होऊ शकतो.
पर्यटनाच्या दृष्टीने महत्त्वाचे असलेल्या या ठिकाणाचे जतन करणे ही प्रशासनाची जबाबदारी असल्याचे मत नागरिकांनी व्यक्त केले आहे. संबंधित विभागाने तातडीने पाहणी करून नदीचा गाळ काढण्याचे काम हाती घ्यावे. तसेच संरक्षण भिंत उभारण्यासाठी निधी मंजूर करावा, अशी मागणी जोर धरत आहे.
उन्हवरे गरम पाणी कुंड हे केवळ पर्यटनस्थळ नसून कोकणच्या नैसर्गिक आणि सांस्कृतिक वारशाचा महत्त्वाचा भाग आहे. त्यामुळे भविष्यातील संभाव्य मोठे नुकसान टाळण्यासाठी प्रशासनाने तातडीने दीर्घकालीन उपाययोजना राबविणे गरजेचे असल्याची भावना स्थानिक नागरिक, पर्यटन व्यावसायिक आणि पर्यटकांकडून व्यक्त होत आहे.
