अव्वल मानांकित अलेक्झांडर झ्वेरेव्हने आर्थर अॅश स्टेडियमवर झालेल्या अमेरिकन ओपन टेनिस स्पर्धेतील आपल्या पहिल्या फेरीच्या सामन्यात लाज वाचवली आणि विजय मिळवला. महिला एकेरीमध्ये एलेना रायबाकिना आणि कोको गॉफ यांनी सरळ सेटमध्ये विजय मिळवून पुढील फेरीत प्रवेश केला.
फ्रेंच ओपन चॅम्पियन झ्वेरेव्हने बिनमानांकित लॉरेन्झो सोनेगोचा विजयाचा प्रयत्न हाणून पाडत चार तास 52 मिनिटे चाललेल्या रोमांचक सामन्यात 6-4, 3-6, 6-7 (7), 7-5, 6-4 असा विजय मिळवला.
दुसरा आणि तिसरा सेट गमावल्यानंतर झ्वेरेव्हने जोरदार पुनरागमन करत इटलीच्या 89 व्या क्रमांकावरील खेळाडू सोनेगोच्या आशा धुळीस मिळवल्या. सोनेगोविरुद्ध झ्वेरेव्हचा हा सलग सातवा विजय आहे. आपल्या दहाव्या अमेरिकन ओपनमध्ये सोनेगो कधीही दुसऱ्या फेरीच्या पुढे जाऊ शकलेला नाही.
सामन्यानंतर झ्वेरेव्ह म्हणाला की, ‘या प्रकारे सामना जिंकता आल्याचा मला आनंद आहे. मला अशा सामन्याची गरज होती. कारण गेल्या दोन स्पर्धांमध्ये माझी कामगिरी चांगली झाली नव्हती. कधीकधी तुम्ही संघर्ष करता आणि तुम्हाला अनुपूल निकाल मिळतो. मला आशा आहे की, मी स्पर्धांमध्ये चांगली कामगिरी करत राहीन.’
पुरुष गटात अमेरिकेच्या नवव्या मानांकित टेलर फ्रिट्झने आपल्याच देशाच्या डार्विन ब्लँचचा 6-3, 6-2, 6-4 असा पराभव केला. पण इटलीच्या पाचव्या मानांकित फ्लाविओ कोबोलीला अर्जेंटिनाच्या फ्रान्सिस्को कोमेसानावर 3-6, 2-6, 6-3, 6-4, 6-4 असा विजय मिळवण्यासाठी पाच सेटपर्यंत झुंज द्यावी लागली.
पहिला सेट गमावल्यानंतर गेल मॉनफिल्सने जोरदार पुनरागमन करत अडोल्पह् डॅनियल व्हॅलेजोचा 2-6, 6-1, 6-2, 6-0 असा पराभव केला आणि आपला 40 वा वाढदिवस संस्मरणीय बनवला. मॉनफिल्स वर्षातील अंतिम ग्रॅण्डस्लॅम स्पर्धेत सामना जिंकणारा सर्वात वयस्कर पुरुष खेळाडू ठरला. यापूर्वी हा विक्रम जिमी कॉनर्स यांच्या नावावर होता, ज्यांनी 2 सप्टेंबर 1992 रोजी वयाच्या 40 व्या वर्षी जेमी ओन्सिन्सला पराभूत केले होते. महिला एकेरीमध्ये द्वितीय मानांकित रायबाकिनाने 17 वर्षीय थिया प्रहडिनचा 6-3, 6-2 असा पराभव केला. चौथ्या मानांकित गॉफनेही झेनेप सोन्मेझला 6-3, 6-4 ने हरवून दुसऱ्या फेरीत प्रवेश केला.
पाचव्या मानांकित मारिया आंद्रीवाने इंडोनेशियन खेळाडू जेनिस जेनिसचा 6-2, 6-2 असा पराभव केला, तर 17 व्या मानांकित अॅलेक्स मैलाने मेरी अस्टोयानाचा 6-1, 6-2 असा पराभव केला. बाराव्या मानांकित बेलिंडा बेन्सिकला पराभवाला सामोरे जावे लागले. कझाकिस्तानच्या बिनमानांकित युलिया पुतिनत्सेवाकडून ती 4-6, 7-5, 6-3 ने पराभूत झाली. मॅडिसन कीजने सरळ सेटमध्ये विजय मिळवून पुढील फेरीत प्रवेश केला.
