मारवाडी फाऊंडेशन, नागपूरच्या वतीने ‘साधना’ साप्ताहिकाचे संपादक आणि सामाजिक कार्यकर्ते विनोद शिरसाठ यांचा ‘प्रबोधनकार ठाकरे समाज प्रबोधन’ पुरस्काराने गौरव करण्यात आला. सामाजिक कार्यकर्ते डॉ. अभय बंग व ज्येष्ठ पत्रकार गिरीश कुबेर यांच्या हस्ते हा पुरस्कार प्रदान करण्यात आला. एक लाख रुपये रोख, सन्मानचिन्ह असे पुरस्काराचे स्वरूप आहे.
चिटणीस सेंटरमध्ये हा सोहळा झाला. ‘सामाजिक चळवळी, आंदोलने संपली आहेत. समाजाचे ऑटोमायझेशन झाले आहे. शिरसाठ यांना ‘साधना’ करिता नवीन वाचक वर्ग निर्माण करावा लागेल’, असे डॉ. अभय बंग यावेळी म्हणाले. सत्काराला उत्तर देताना विनोद शिरसाठ म्हणाले, पत्रकारिता हा लोकशाहीचा चौथा तर समाजकार्य हा पाचवा स्तंभ आहे. या दोन्ही स्तंभांची युती होणे आवश्यक आहे.
