उत्तराखंडमधील टिहरी जिल्ह्यात चारधाम यात्रेकरूंना घेऊन जाणाऱ्या बसचा अपघात झाला. बसचे ब्रेक अचानक निकामी झाल्याने चालकाचा वाहनावरील ताबा सुटला आणि बस रस्त्यावर उलटली. सुदैवाने या दुर्घटनेत कोणतीही जीवितहानी झाली नाही. मात्र, आठ प्रवासी किरकोळ जखमी झाले आहेत. रविवारी सकाळी साडेआठच्या सुमारास तोटाघाटी परिसरात हा अपघात घडला. बद्रीनाथहून ऋषिकेशकडे निघालेली बस डोंगराळ रस्त्यावरून जात असताना ब्रेकमध्ये बिघाड झाला. त्यामुळे बस रस्त्यावर पलटी झाली.
घटनेची माहिती मिळताच एसडीआरएफ, पोलीस आणि स्थानिक प्रशासनाची पथके तातडीने घटनास्थळी पोहोचली. बचाव पथकांनी बसमधील सर्व प्रवाशांना सुरक्षित बाहेर काढले. बसमध्ये एकूण 39 प्रवासी प्रवास करत होते. अपघातात जखमी झालेल्या आठ जणांना त्वरित उपचारासाठी 108 रुग्णवाहिकेद्वारे ऋषिकेश येथील रुग्णालयात दाखल करण्यात आले. सर्वांची प्रकृती स्थिर असल्याची माहिती प्रशासनाने दिली आहे. असे वृत्त दैनिक जागरण ने दिले आहे.
या अपघातामुळे काही काळ परिसरात गोंधळाचे वातावरण निर्माण झाले होते. मात्र, बचाव पथकांच्या तत्परतेमुळे मोठी दुर्घटना टळली. दरम्यान, बसच्या ब्रेकमध्ये नेमका कोणता बिघाड झाला होता, याचा तपास प्रशासनाकडून सुरू करण्यात आला आहे. चारधाम यात्रेच्या पार्श्वभूमीवर दररोज हजारो भाविक डोंगराळ मार्गांवरून प्रवास करत आहेत. त्यामुळे वाहनांची नियमित तपासणी आणि सुरक्षिततेच्या उपाययोजनांचे महत्त्व पुन्हा एकदा अधोरेखित झाले आहे.
