आखाती देशातील वाढत्या तणावाच्या पार्श्वभूमीवर, इराणने इस्रायलविरुद्ध सुरू असलेली आपली लष्करी मोहीम अचानक थांबवल्याची घोषणा केली आहे. तसेच इराणने इशारा दिला आहे की, जर इस्रायलने लेबनॉन किंवा इतरत्र पुन्हा हल्ले सुरू केले, तर त्याचे विनाशकारी परिणाम भोगावे लागतील.
इराणने इस्रायलविरोधातील लष्करी मोहीम अचानक थांबवल्याची घोषणा केली तसेच इस्रायलला कठोर शब्दांत इशाराही दिला आहे. इस्रायल आणि इराणमधील तणावाच्या पार्श्वभूमीवर इराणची ही घोषणा महत्त्वाची मानली जात आहे. लेबनॉनच्या समर्थनार्थ आम्ही जबरदस्त प्रत्युत्तर दिले आहे, असा दावाही इराणने केला आहे. इस्रायलला इशारा देत इराणी लष्कराने इस्रायलविरुद्धच्या आपल्या लष्करी मोहिमा थांबवल्याची घोषणा केली. जर इस्रायलने पुन्हा हल्ले सुरू केले, तर त्यांचे परिणाम विनाशकारी होतील.
फार्स वृत्तसंस्थेनुसार, इराणच्या खतम अल-अंबिया केंद्रीय मुख्यालयाने इस्रायलविरुद्धची लष्करी मोहीम थांबवल्याची घोषणा केली आहे. इराणी लष्कराने दावा केला आहे की, लेबनॉनच्या पीडित लोकांच्या समर्थनार्थ झिओनिस्ट राजवटीला प्रत्युत्तर देण्यात आले आहे आणि ही लष्करी कारवाई तात्पुरती थांबवण्यात आली आहे.
सोमवारी जारी केलेल्या एका निवेदनात, इराणच्या लष्करी नेतृत्वाने म्हटले आहे की, दोन महिन्यांपूर्वी अमेरिकेच्या मध्यस्थीने झालेल्या युद्धविरामानंतर इस्रायल आणि इराण यांच्यातील हा पहिला थेट लष्करी संघर्ष आहे. या ताज्या संघर्षामुळे संपूर्ण आखाती देश पुन्हा एकदा युद्धाच्या उंबरठ्यावर आले आहे.
इराणचे अध्यक्ष मसूद पेझेश्कियन म्हणाले की, देशाची राष्ट्रीय सुरक्षा आणि नागरिकांची शांतता सुनिश्चित करणे हे त्यांच्या सरकारचे सर्वोच्च प्राधान्य आहे. इराण आपल्या हक्कांचे आणि राष्ट्रीय हितांचे पूर्ण ताकदीने रक्षण करेल आणि कोणत्याही धोक्याला किंवा दबावाला न जुमानता मागे हटणार नाही, असा निर्धारही त्यांनी व्यक्त केला.
पेझेश्कियन यांनी यावर जोर दिला की, मुत्सद्देगिरी आणि संरक्षण हे राष्ट्रीय शक्तीचे दोन महत्त्वाचे आधारस्तंभ आहेत. त्यांनी सांगितले की, इराणने वाटाघाटीचे मैदान किंवा वाटाघाटीचे टेबल सोडलेले नाही. एकता, संयम आणि सामंजस्याच्या माध्यमातून इराण या कठीण काळातून यशस्वीपणे बाहेर पडेल, असा विश्वासही त्यांनी व्यक्त केला.
इराणच्या संयुक्त कमांडने म्हटले आहे की, जर इस्रायल किंवा त्याचे हस्तक दक्षिण लेबनॉनसह कोणत्याही प्रदेशात आक्रमक आणि शत्रुत्वपूर्ण कारवाया करतील, तर इराण आणखी कठोर उपाययोजना करेल. इराणच्या लष्कराचे हे विधान अशा वेळी आले आहे, जेव्हा दोन्ही देशांमधील तणाव सतत वाढत आहे. रविवार संध्याकाळपासून, इराणने इस्रायलच्या विविध भागांवर क्षेपणास्त्रे डागली आहेत. इस्रायलने कोणतीही पूर्वसूचना न देता बैरूतच्या दक्षिण भागांवर लष्करी कारवाई सुरू केल्यानंतर हा हल्ला झाला. इराणच्या क्षेपणास्त्र हल्ल्यानंतर, इस्रायलनेही मध्य आणि पश्चिम इराणमधील अनेक ठिकाणांना लक्ष्य केले.
केंद्र सरकारनेही आपल्या नागरिकांसाठी एक नवीन सूचना जारी केली आहे. हिंदुस्थानने सोमवारी इस्रायल आणि इराणमधील भारतीय नागरिकांना अत्यंत सावधगिरी बाळगण्याचे, सतर्क राहण्याचे आणि दोन्ही देशांमधील सर्व अनावश्यक प्रवास टाळण्याचे आवाहन केले. इराणमधील भारतीय दूतावासाने म्हटले आहे की, प्रदेशातील वेगाने बदलणारी सुरक्षा परिस्थिती लक्षात घेता, भारतीय नागरिकांनी इराणला प्रवास करणे टाळावे. दूतावासाने इराणमधील भारतीयांना उपलब्ध वाहतुकीच्या साधनांचा वापर करून शक्य तितक्या लवकर देश सोडण्याचा सल्लाही दिला आहे. तेल अवीवमधील भारतीय दूतावासानेही सुरक्षा सूचना जारी केल्या आहेत.
भारतीय दूतावासाने म्हटले आहे की, इस्रायलमध्ये राहणाऱ्या सर्व भारतीय नागरिकांनी होम फ्रंट कमांडने जारी केलेल्या सुरक्षा मार्गदर्शक तत्त्वांचे काटेकोरपणे पालन करावे. सध्याची सुरक्षा परिस्थिती पाहता, नागरिकांनी अत्यंत सावधगिरी बाळगावी, सुरक्षित आश्रयस्थानांजवळ राहावे आणि जवळपासच्या सर्वात सुरक्षित ठिकाणांची माहिती गोळा करावी.
