दिवसभरात थोडे थोडे चालत राहणे हा अधिक व्यावहारिक मार्ग ठरू शकतो. तुम्ही कार्यालयात काम करत असाल, तर लिफ्टऐवजी जिन्यांचा वापर करणे, जवळच्या ठिकाणी जाण्यासाठी पायी जाणे किंवा फोनवर बोलताना चालणे अशा सोप्या उपायांमुळे रोजच्या हालचाली वाढवता येतात.
व्यायामामुळे हृदयाला कोणते फायदे होतात?
नियमित शारीरिक हालचाली केल्याने हृदयाचे आरोग्य सुधारण्यास मदत होते. यामुळे हृदयविकार, पक्षाघात, टाइप-२ मधुमेह आणि उच्च रक्तदाब यांसारख्या समस्यांचा धोका कमी होण्यास मदत होऊ शकते. याशिवाय नियमित व्यायामामुळे झोप, मनःस्थिती, शरीराचे वजन आणि एकूण तंदुरुस्ती सुधारण्यासही मदत होते.
विशेष म्हणजे, व्यायामाचा फायदा केवळ जास्त वजन असलेल्या लोकांनाच होतो असे नाही. सामान्य वजन असलेल्या व्यक्तींनीही नियमित व्यायाम करणे आणि दिवसभर सक्रिय राहणे आवश्यक आहे. कारण शरीराचे वजन सामान्य असले, तरी उच्च रक्तदाब, कोलेस्टेरॉल किंवा रक्तातील साखरेचे प्रमाण वाढण्यासारख्या समस्या उद्भवू शकतात.
तुम्ही बराच काळ व्यायाम केला नसेल, तर सुरुवातीलाच जास्त मेहनत करण्याची गरज नाही. दररोज काही मिनिटे चालण्यापासून सुरुवात करा आणि हळूहळू वेळ वाढवा. थोडीशी शारीरिक हालचाल करणे हे अजिबात सक्रिय न राहण्यापेक्षा चांगले आहे. हृदयाची काळजी घेण्यासाठी सर्वात महत्त्वाची गोष्ट म्हणजे व्यायाम केवळ जिम किंवा ठरावीक वेळेपुरता मर्यादित न ठेवणे. दररोज थोडे अधिक चालणे, दीर्घकाळ एकाच जागी बसणे टाळणे आणि आपल्या क्षमतेनुसार नियमित शारीरिक हालचाली करणे ही हृदय निरोगी ठेवण्यासाठी महत्त्वाची पावले आहेत.
