फेब्रुवारी-मार्च 2027 मध्ये होणाऱ्या दहावी-बारावीच्या बोर्ड परीक्षांसाठी पुढील आदेश येईपर्यंत विद्यार्थ्यांकडून परीक्षा शुल्क घेतले जाऊ नये. त्यांचे ऑनलाइन अर्ज शुल्क न घेता भरून घ्यावेत अशा सूचना महाराष्ट्र राज्य माध्यमिक व उच्च माध्यमिक शिक्षण मंडळाने दिल्या आहेत.
या संदर्भात राज्य शिक्षण मंडळाचे सचिव डॉ. दीपक माळी यांनी सर्व विभागीय मंडळांना पत्र पाठवून महत्त्वपूर्ण आदेश दिले आहेत. या आदेशानुसार, दुष्काळग्रस्त तालुक्यांमध्ये येणाऱ्या सर्व शाळा आणि कनिष्ठ महाविद्यालयांना तातडीने आवश्यक त्या सूचना देण्यास सांगण्यात आले आहे. तसेच, या संपूर्ण प्रक्रियेत करण्यात आलेल्या कार्यवाहीचा अहवाल विनाविलंब मंडळाकडे सादर करण्याचे निर्देशही देण्यात आले आहेत.
विद्यार्थ्यांच्या परीक्षा शुल्कासंदर्भात राज्य मंडळाकडून लवकरच सविस्तर आणि सुधारित सूचना जारी केल्या जाणार आहेत. तोपर्यंत, दुष्काळग्रस्त भागातील संबंधित विद्यार्थ्यांकडून कोणतेही परीक्षा शुल्क जमा न करता, केवळ त्यांचे परीक्षा अर्ज भरून घेण्याची प्रक्रिया राबवण्यात यावी, असे स्पष्ट करण्यात आले आहे.
