राज्यातील दुष्काळी परिस्थिती आणि शेतकऱ्यांच्या वाढत्या अडचणी लक्षात घेऊन शिवसेनेने यंदाचा जय भवानी दांडिया महोत्सव रद्द करत आत्महत्याग्रस्त शेतकरी कुटुंबांना आर्थिक मदत करण्याचा निर्णय घेतला होता. या निर्णयाची अंमलबजावणी करत चंद्रपूर जिल्ह्यातील चार आत्महत्याग्रस्त शेतकरी कुटुंबांना प्रत्येकी ५० हजार रुपयांची मदत देण्यात आली. शिवसेनेचे जिल्हाप्रमुख संदीप गिर्हे यांच्यासह पक्षाच्या पदाधिकारी आणि कार्यकर्त्यांनी संबंधित कुटुंबांच्या घरी जाऊन मदतीची रक्कम सुपूर्द केली. सण-उत्सवावरील खर्च टाळून संकटग्रस्त शेतकरी कुटुंबांना मदत करण्याच्या या उपक्रमाचे कौतुक होत आहे.
चंद्रपूर शहरात गेल्या अनेक वर्षांपासून शिवसेनेच्या वतीने नवरात्रोत्सवानिमित्त जय भवानी दांडिया महोत्सवाचे आयोजन करण्यात येते. या महोत्सवाला दरवर्षी नागरिकांचा मोठा प्रतिसाद मिळतो. मात्र, यावर्षी जिल्ह्यातील दुष्काळी परिस्थिती आणि शेतकऱ्यांवर ओढवलेले आर्थिक संकट लक्षात घेता शिवसेनेने दांडिया महोत्सव रद्द करण्याचा निर्णय घेतला.
दांडिया महोत्सवाच्या आयोजनासाठी खर्च होणारी रक्कम आत्महत्याग्रस्त शेतकरी कुटुंबे आणि गरजू शेतकऱ्यांच्या मदतीसाठी वापरण्यात येईल, अशी घोषणा शिवसेनेचे चंद्रपूर जिल्हाप्रमुख संदीप गिऱ्हे यांनी केली होती. केवळ उत्सव साजरा करण्यापेक्षा संकटात सापडलेल्या शेतकरी कुटुंबांच्या पाठीशी उभे राहण्याची भूमिका शिवसेनेने घेतली. या घोषणेप्रमाणे चंद्रपूर जिल्ह्यातील मारडा आणि वेळवा या दोन गावांतील आत्महत्याग्रस्त शेतकरी कुटुंबांना प्रत्येकी ५० हजार रुपयांची आर्थिक मदत देण्यात आली. शिवसेनेचे जिल्हाप्रमुख संदीप गिऱ्हे आणि कार्यकर्त्यांनी थेट कुटुंबीयांच्या घरी जाऊन मदतीची रक्कम त्यांच्या स्वाधीन केली. या माध्यमातून चार शेतकरी कुटुंबांना एकूण दोन लाख रुपयांची मदत देण्यात आली.
शेतकरी हा ग्रामीण अर्थव्यवस्थेचा कणा असून, नैसर्गिक संकटांमुळे शेतकऱ्यांवर आर्थिक संकट ओढवल्यास त्यांच्या कुटुंबीयांनाही मोठ्या अडचणींचा सामना करावा लागतो. अशा परिस्थितीत सामाजिक बांधिलकी जपत शेतकरी कुटुंबांना आधार देण्याचा प्रयत्न शिवसेनेच्या वतीने करण्यात आला आहे. दांडिया महोत्सव रद्द करून त्या निधीचा उपयोग गरजू कुटुंबांसाठी करण्याचा निर्णय या उपक्रमातून अधोरेखित झाला.
यावेळी शिवसेनेचे जिल्हाप्रमुख संदीप गिऱ्हे, माजी जिल्हाप्रमुख सतीश भिवगडे, उपमहापौर दानव, गटनेते राहुल विरूटकर, नगरसेवक आकाश साखरकर, नगरसेविका श्रुती घटे, नगरसेविका श्वेता लांडगे, नगरसेवक आशिष कवटकर, सोनू ठाकूर, आणि राहुल बेले यांच्यासह शिवसेनेचे पदाधिकारी व कार्यकर्ते उपस्थित होते. दुष्काळाच्या संकटात शेतकरी कुटुंबांना मदतीचा हात देत शिवसेनेने सामाजिक बांधिलकी जपण्याचा प्रयत्न केला आहे. उत्सवावरील खर्च टाळून गरजूंच्या मदतीला प्राधान्य देणारा हा उपक्रम सध्या चर्चेचा विषय ठरत आहे.
