द्रविड मुन्नेत्र कळघम (DMK) संसदीय पक्षाने शनिवारी एक ठराव संमत करून मुख्य निवडणूक आयुक्त ज्ञानेश कुमार यांना तातडीने पदावरून हटवण्याची आणि त्यांच्या वर्तनाची चौकशी करण्याची मागणी केली आहे. एसआयआर प्रक्रियेच्या माध्यमातून वैध मतदारांना पद्धतशीरपणे मतदानापासून वंचित ठेवण्याचे नेतृत्व त्यांनी केल्याचा आरोप पक्षाने केला आहे.
डीएमकेचे अध्यक्ष आणि तामिळनाडूचे माजी मुख्यमंत्री एम. के. स्टॅलिन यांच्या नेतृत्वाखाली पक्ष मुख्यालय अण्णा अरिवलयम येथील मुरासोली मारन मीटिंग हॉलमध्ये आयोजित डीएमके खासदारांच्या बैठकीत संमत करण्यात आलेल्या चार ठरावांपैकी हा एक ठराव होता.
ठरावानुसार, ज्या बिहार राज्यामध्ये पहिल्यांदा एसआयआर लागू करण्यात आली, तेथे मोठ्या संख्येने मतदारांना मतदार यादीतून पद्धतशीरपणे वगळण्यात येत असल्याच्या बातम्या समोर आल्यावर, डीएमके अध्यक्ष एम. के. स्टॅलिन यांनी जुलै २०२५ मध्येच याविरोधात आवाज उठवला होता. तसेच बिहारमध्ये आयोजित व्होटर अधिकार यात्रेत ही त्यांनी सहभाग घेतला होता. त्यानंतर निवडणूक आयोगाने तामिळनाडूसह १२ राज्यांमध्ये ही प्रक्रिया राबवण्याची घोषणा केली असता, भाजपकडून हे कथित षडयंत्र तामिळनाडूतही आणले जात असल्याचे स्टॅलिन म्हणाले होते.
डीएमकेच्या या बैठकीत ठराव करण्यात आला की, इतर दोन निवडणूक आयुक्तांचा विरोध असतानाही या अन्यायाचे नेतृत्व करणारे मुख्य निवडणूक आयुक्त ज्ञानेश कुमार यांना पदावरून हटवण्यात यावे आणि त्यांची योग्य ती चौकशी व्हावी. आपल्या दुसऱ्या ठरावात, डीएमकेने विद्यार्थी संघटनांच्या आंदोलनांना आपला पूर्ण पाठिंबा दर्शवला. पक्षाने स्पष्ट केले की, त्यांची भूमिका ठाम आहे. एसआयआर रद्द झालेच पाहिजे आणि मुख्य निवडणूक आयुक्तांना पदावरून हटवले पाहिजे.
