दिवसाची सुरुवात अनेक जण एक कप कॉफीने करतात. कॉफीचे अतिसेवन आरोग्यासाठी घातक मानले जात असले, तरी मर्यादित प्रमाणात कॉफी पिणे हृदयाच्या आरोग्यासाठी फायदेशीर ठरू शकते, असे एका नव्या संशोधनातून समोर आले आहे. अमेरिकन हार्ट असोसिएशनने प्रसिद्ध केलेल्या वैज्ञानिक निष्कर्षांनुसार, बहुतांश निरोगी प्रौढांसाठी दररोज सुमारे 400 मिलिग्रॅमपर्यंत कॅफीनचे सेवन सुरक्षित मानले जाते. यामुळे हृदयविकार, स्ट्रोक आणि हृदय निकामी होण्याचा धोका काही प्रमाणात कमी होऊ शकतो.
तज्ज्ञांच्या मते, कॉफीतील नैसर्गिक अँटिऑक्सिडंट्स आणि दाह कमी करणारे घटक रक्तवाहिन्यांचे संरक्षण करण्यास मदत करतात. त्यामुळे मर्यादित प्रमाणात घेतलेली कॉफी आरोग्यासाठी फायदेशीर ठरू शकते. मात्र, हा फायदा साखर, फ्लेवर्ड सिरप किंवा जास्त क्रीम घातलेल्या कॉफीपेक्षा साध्या ब्लॅक कॉफीमध्ये अधिक असल्याचे संशोधनात नमूद करण्यात आले आहे.
दुसरीकडे, एनर्जी ड्रिंक्सबाबत मात्र संशोधकांनी सावधगिरी बाळगण्याचा सल्ला दिला आहे. अनेक एनर्जी ड्रिंक्समध्ये सामान्य कॉफीपेक्षा तीन ते चार पट अधिक कॅफीन असते. त्यामुळे रक्तदाब वाढणे, हृदयाची धडधड अनियमित होणे आणि इतर हृदयविकारांचा धोका वाढू शकतो. डॉक्टरांच्या मते, प्रत्येक व्यक्तीच्या शरीरावर कॅफीनचा परिणाम वेगळा होतो. वय, आनुवंशिकता, यकृताची कार्यक्षमता, औषधे आणि कॅफीन घेण्याची सवय यावर त्याचा प्रभाव अवलंबून असतो. काहींना एक कप कॉफीही त्रासदायक ठरू शकते, तर काही जण अनेक कप कॉफी सहज पचवू शकतात.
तज्ज्ञांच्या मते, दिवसातून दोन ते चार कप कॉफी बहुतेक निरोगी व्यक्तींसाठी योग्य मानली जाते. मात्र हृदयविकार, उच्च रक्तदाब किंवा इतर आरोग्यविषयक समस्या असल्यास डॉक्टरांचा सल्ला घेऊनच कॅफीनचे सेवन करावे.
