उत्तर प्रदेशातील संतकबीर नगर जिल्ह्यात एका पतीने आपल्या पत्नीच्या सुखासाठी घेतलेल्या अत्यंत वेगळ्या आणि धक्कादायक निर्णयाची सध्या सर्वत्र चर्चा होत आहे. जिल्ह्यातील धनघटा पोलीस ठाण्याच्या हद्दीतील देबारी गावात हा प्रकार उघडकीस आला असून, पत्नीचे परपुरुष असलेल्या प्रियकरासोबत जुळलेले प्रेमप्रकरण आणि त्यानंतर पतीने घेतलेला समजूतदारपणाचा निर्णय यामुळे ही घटना चर्चेच्या केंद्रस्थानी आली आहे.
मिळालेल्या सविस्तर माहितीनुसार, देबारी गावातील निवासी असलेल्या बुद्धिराम निषाद यांचा विवाह सुमारे एकवीस वर्षांपूर्वी फुलमती नावाच्या महिलेशी झाला होता. या दांपत्याला संसारामध्ये पाच मुले देखील आहेत. मात्र, गेल्या काही काळापासून फुलमती हिचे मन पतीपासून दुरावले आणि ती त्याच गावातील अवधेश नावाच्या एका तरुणाच्या प्रेमात पडली. हे प्रेमप्रकरण इतके वाढले की, सुमारे दोन महिन्यांपूर्वी फुलमती आपल्या पती आणि पाचही मुलांना अंधारात ठेवून प्रियकर अवधेशसोबत पळून गेली. पत्नीच्या अशा वागण्यामुळे कुटुंबावर संकट ओढवले, मात्र काही दिवसानंतर घरच्या मंडळींनी आणि गावकऱ्यांनी मध्यस्थी करून तिची समजूत काढल्यानंतर ती कशीतरी परत आली. मात्र, घरी परतल्यानंतरही रोजची भांडणे आणि वाद काही थांबत नव्हते. या रोजच्या तणावाला कंटाळून आणि या वादावर कायमस्वरूपी तोडगा काढण्यासाठी पती बुद्धिरामने एक अत्यंत टोकाचा आणि अनोखा निर्णय घेतला. त्याने आपल्या पत्नीच्या त्रासातून सुटका करून घेत तिच्याच इच्छेनुसार तिचा संसार सुरळीत व्हावा म्हणून तिचा विवाह तिच्या प्रियकराशी लावून देण्याचे ठरवले. त्यानुसार, नुकताच गावकरी आणि कुटुंबातील काही सदस्यांच्या प्रमुख उपस्थितीत अशरफपूर येथील एका शिव मंदिरात बुद्धिरामने आपल्या पत्नीचा विवाह तिचा प्रियकर अवधेशसोबत लावून दिला. एवढेच नव्हे तर, तिची पाठवणी करत तिला आनंदाने निरोपही दिला.
या संपूर्ण प्रकरणावर प्रतिक्रिया देताना पती बुद्धिरामने सांगितले की, माझी पत्नी शेजारच्या गावातील एका तरुणाच्या प्रेमात वेडी झाली होती. जेव्हा तिला माझ्यासोबत राहणे किंवा संसार करणे नकोसे झाले होते, तेव्हा तिच्याच आनंदासाठी मी तिचे लग्न तिच्या प्रियकराशी लावून देणेच योग्य समजले. विनाकारण त्यांच्या प्रेमाच्या मध्ये येऊन मला माझा जीव धोक्यात घालायचा नव्हता किंवा रोजचा कलह वाढवायचा नव्हता, असेही त्याने स्पष्ट केले. विशेष म्हणजे, या संपूर्ण प्रकारानंतर जेव्हा पत्नी फुलमतीला तिच्या या दुसऱ्या विवाहाबद्दल विचारण्यात आले, तेव्हा तिने कुठल्याही प्रकारचा संकोच न बाळगता जणू काही तो तिचा हक्कच होता अशा थाटात प्रतिक्रिया दिली. पत्नीचे प्रियकराशी लग्न लागवून देणाऱ्या पतीच्या या निर्णयाची सगळीकडे चर्चा होत आहे.
