लिंबाचा रस काढल्यानंतर त्याची साल अनेक जण कचऱ्यात फेकून देतात. मात्र, लिंबाच्या सालीमध्येही काही उपयुक्त घटक असतात. त्यांचा वापर त्वचेची स्वच्छता तसेच घरातील विविध वस्तू स्वच्छ करण्यासाठी करता येऊ शकतो. लिंबाच्या सालीमध्ये व्हिटॅमिन सी, सिट्रिक अॅसिड आणि अँटिऑक्सिडंट्स आढळतात. त्यामुळे त्यांचा वापर घरगुती स्वच्छतेसाठी केला जातो.
लिंबाच्या सालीचा नैसर्गिक स्क्रब म्हणून वापर करण्यासाठी त्यावर थोडी साखर आणि गुलाबपाणी लावून कोपर किंवा गुडघ्यांवर हलक्या हाताने चोळता येते. मात्र, चेहऱ्यावर लिंबाची साल किंवा लिंबू थेट वापरण्यापूर्वी त्वचेवर छोट्या भागात चाचणी करणे महत्त्वाचे आहे. संवेदनशील त्वचा असल्यास असा प्रयोग टाळणे चांगले.
लिंबाच्या साली उन्हात वाळवून त्याची पावडरही तयार करता येते. ही पावडर दही किंवा मधासोबत मिसळून फेस पॅक म्हणून वापरण्याची पद्धत आहे. मात्र, त्वचेवर जळजळ किंवा खाज निर्माण झाल्यास त्वरित वापर थांबवावा.
लिंबाच्या सालीवर थोडे मीठ लावून तांबे किंवा पितळेच्या काळवंडलेल्या भांड्यांवर हलक्या हाताने घासता येते. यामुळे भांड्यांवरील मळ आणि काळेपणा कमी करण्यास मदत होऊ शकते.
एका भांड्यात पाणी घेऊन त्यात लिंबाच्या साली टाका आणि मायक्रोवेव्हमध्ये काही मिनिटे गरम करा. तयार झालेल्या वाफेमुळे आतली चिकट घाण सैल होण्यास मदत होते. त्यानंतर कापडाने आतील भाग पुसता येतो. लिंबाच्या सालीने सिंक घासल्याने दुर्गंधी कमी करण्यासही मदत होऊ शकते.
लिंबाच्या साली पाण्यात उकळून ते पाणी गाळून स्प्रे बाटलीत भरता येते. काच किंवा खिडकीवर याची हलकी फवारणी करून स्वच्छ कापडाने पुसल्यास काचेवरील मळ कमी करण्यास मदत होऊ शकते.
लिंबाच्या साली पाण्यात उकळून त्यात काही थेंब सुगंधी तेल घातल्यास घरासाठी नैसर्गिक फ्रेशनरप्रमाणे त्याचा वापर करता येतो. फ्रिज किंवा मायक्रोवेव्हमधील दुर्गंधी कमी करण्यासाठीही लिंबाच्या सालीचा वापर केला जातो.
