श्रीलंका दौऱ्यावर असलेला हिंदुस्थानचा संघ दुखापतींच्या संकटाचा सामना करत आहे. जसप्रीत बुमराह आणि साई सुदर्शन दुखापतीमुळे संघातून बाहेर झाल्यानंतर आता वॉशिंग्टन सुंदरच्या दुसऱ्या कसोटीसाठीच्या उपलब्धतेवरही मोठे प्रश्नचिन्ह निर्माण झाले आहे. हॅमस्ट्रिंगच्या दुखापतीतून सावरत असल्यामुळे निवड समितीने वॉशिंग्टनची दुसऱ्या कसोटीसाठी निवड केली होती.
खबरदारी घेण्याची तयारी
बीसीसीआयच्या एका सूत्रांनी सांगितले की, ‘सध्या वॉशिंग्टनची श्रीलंकेला जाण्याची शक्यता खूपच कमी आहे. संघ व्यवस्थापनाला त्यानुसार नियोजन करण्यास सांगितले आहे. बीसीसीआयचे वैद्यकीय पथक त्याला कसोटी सामन्यात खेळवण्याबाबत सावधगिरी बाळगत आहे. आतापर्यंत अशी काही प्रकरणे घडली आहेत, ज्यात खेळाडू दुखापतीतून बरे झाल्यानंतर लगेचच पुन्हा जखमी झाले आहेत. त्यामुळे वॉशिंग्टनला श्रीलंकेत न पाठवण्याचा मानस बीसीसीआयचा असल्याचे आता समोर येत आहे.’
दुसऱ्या कसोटीसाठी केली होती निवड
सूत्रांनी पुढे सांगितले की, ‘वॉशिंग्टन लवकर पूर्ण तंदुरुस्त होऊ शकत नाही हे माहीत असल्याने त्याची निवड केवळ दुसऱ्या कसोटीसाठी करण्यात आली होती. गेल्या महिन्यात इंग्लंडमध्ये झालेल्या दुखापतीनंतर तो फारसे सामने खेळलेला नाही. त्याचा कामाचा भार सावधगिरीने वाढवला जात आहे. जर वॉशिंग्टन अधिपृतपणे संघाबाहेर गेला तर निवड समिती त्याच्या जागी दुसऱ्या खेळाडूची निवड करण्याची शक्यता कमी आहे. निवड समितीने आधीच 15 खेळाडूंचा संघ निवडला आहे.’
आकाश दीपही तंदुरुस्त नाही
आकाश दीपबाबत सूत्रांनी सांगितले की, ‘पुढील वर्षापासून हिंदुस्थानी क्रिकेटला बुमराशिवाय (कसोटी सामन्यांमध्ये) खेळण्याची तयारी सुरू करावी लागू शकते. श्रीलंका दौऱ्यापर्यंत आकाश दीप क्रिकेटसाठी तंदुरुस्त व्हावा हे प्रशिक्षण समितीचे ध्येय होते, पण तसे झाले नाही. कारण पाठीच्या दुखापतीतून सावरणे सोपे नसते. तो न्यूझीलंड दौऱ्यासाठी उपलब्ध होईल अशी संघ व्यवस्थापनाला आशा आहे. जर बुमरा आणि आकाश दोघेही न्यूझीलंडमधील दोन कसोटी सामन्यांसाठी उपलब्ध असतील तर ते संघासाठी खूप चांगले होईल.’
बुमरा इंग्लंडमध्ये झालेल्या गुडघ्याच्या दुखापतीतून सावरत आहे, तर आकाश दीप पाठीच्या स्ट्रेस फ्रॅक्चरमुळे खेळलेला नाही.
