बांगलादेशच्या क्रिकेट संघाने इतिहास रचला आहे. नजमुल हुसैन शांतो याच्या नेतृत्वाखाली खेळताना बांगलादेशने बलाढ्य ऑस्ट्रेलियाचा 9 गडी राखून पराभव केला. ऑस्ट्रेलियात बांगलादेशचा हा पहिलावहिला कसोटी विजय ठरला आहे. अष्टपैलू मेहदी हसन मिराझ आणि वेगवान गोलंदाज हसन महमूद यांच्या चमकदार कामगिरीच्या जोरावर बांगलादेशने हा विजय मिळवला आहे. दोन्ही डावात मिळून 9 गडी बाद करणाऱ्या हसन महमूद याला प्लेअर ऑफ द मॅच पुरस्कार देऊन गौरवण्यात आले.
सामन्याच्या चौथ्या दिवशी मेहदी हसन मिराजने ऑस्ट्रेलियाच्या तळाच्या फलंदाजांना गुंडाळत कसोटी कारकिर्दीत 15 व्यांदा डावात 5 बळी घेण्याची किमया साधली. मिराजने 66 धावा देऊन 5 फलंदाज बाद केले. यापूर्वी फलंदाजीतही त्याने 65 धावांची महत्त्वपूर्ण खेळी केली होती. दुसऱ्या बाजूने पहिल्या डावात 6 बळी घेणाऱ्या हसन महमूदने दुसऱ्या डावातही 3 बळी घेतले.
ग्रीनचा शतकी संघर्ष
पहिल्या डावाप्रमाणे दुसऱ्या डावातही ऑस्ट्रेलियाची आघाडीची फलंदाजी कोसळली. चौथ्या दिवसाचा खेळ सुरू झाला तेव्हा ऑस्ट्रेलियाच्या 6 विकेट्स शिल्लक होत्या. कॅमेरून ग्रीनने एका बाजूने किल्ला लढवत 104 धावांची शतकी खेळी केली. हे त्याचे मायदेशातील पहिलेच कसोटी शतक ठरले. त्याला मिचेल स्टार्कने (43 धावा) चांगली साथ दिली. मात्र, तास्किन अहमदने स्टार्कला बाद करत ही जोडी फोडली. त्यानंतर हसन महमूदने ग्रीनचा त्रिफळा उडवत ऑस्ट्रेलियाचा दुसरा डाव 284 धावांवर रोखला.
ऐतिहासिक विजय
बांगलादेशला विजयासाठी 57 धावांचे आव्हान मिळाले होते. हे आव्हान बांगलादेशने 1 विकेट गमावून पूर्ण केले. पहिल्या डावामध्ये शतकी खेळी करणारा तन्झिद हसन तमीम हा दुसऱ्या डावामध्ये शुन्यावर बाद झाला. जोस हेझलवूड याने त्याला दुसऱ्याच षटकामध्ये बोल्ड केले. त्यानंतर मोमिनूल हक (नाबाद 25 धावा) आणि शदमन इस्लाम (नाबाद 30 धावा) यांनी अधिक पडझड न होऊ देता संघाला ऐतिहासिक विजय मिळवून दिला.
Bangladesh stun Australia to register landmark first Test victory Down Under 👏#WTC27 📝: https://t.co/gIQtdBGVou pic.twitter.com/xQdTVZchm6
— ICC (@ICC) August 16, 2026
संक्षिप्त धावफलक –
ऑस्ट्रेलिया (पहिला डाव) – 198/10
बांगलादेश (पहिला डाव) – 426/10
ऑस्ट्रेलिया (दुसरा डाव) – 284/10
बांगलादेश (दुसरा डाव) – 57/1
