भारतीय रिझर्व्ह बँकेने (आरबीआय) नियामक नियमांचे पालन न केल्याबद्दल पाच कंपन्यांवर कठोर कारवाई केली आहे. केंद्रीय बँकेने विविध प्रकरणांमध्ये या कंपन्यांवर एकूण अंदाजे ४५ लाख रुपयांचा दंड ठोठावला आहे. या यादीमध्ये ट्रान्सयुनियन सिबिल, क्रिफ हाय मार्क क्रेडिट इन्फॉर्मेशन सर्व्हिसेस, इक्विफॅक्स क्रेडिट इन्फॉर्मेशन सर्व्हिसेस, सन्मान फिनसर्व्ह आणि हिंदुजा लेलँड फायनान्स यांचा समावेश आहे.
आरबीआयकडून मिळालेल्या माहितीनुसार, विविध नियामक उल्लंघनांमुळे ही कारवाई करण्यात आली. काही कंपन्यांनी नियामक आवश्यकतांचे पालन केले नसल्याचे आढळून आले, त्यामुळे त्यांच्यावर आर्थिक दंड आकारण्यात आला.
ट्रान्सयुनियन सिबिल: रु. २६,८२,८००, क्रिफ हाय मार्क क्रेडिट इन्फॉर्मेशन सर्व्हिसेस: रु. ६,८९,६००, इक्विफॅक्स क्रेडिट इन्फॉर्मेशन सर्व्हिसेस: रु. १,१९,४००, सन्मान फिनसर्व्ह: रु. ४.२० लाख, हिंदुजा लेलँड फायनान्स: रु. ६.२० लाख एवढा दंड ठोठावण्यात आला आहे.
आरबीआयच्या मते, ट्रान्सयुनियन सिबिल, क्रिफ हाय मार्क आणि इक्विफॅक्स क्रेडिट इन्फॉर्मेशन सर्व्हिसेस या तीन कंपन्या काही तक्रारदारांना विहित वेळेत नुकसान भरपाई देण्यात अयशस्वी ठरल्या. त्यामुळेच आरबीआयने त्यांच्यावर आर्थिक दंड लावला.
आरबीआयच्या मते, इतर दोन कंपन्यांनी क्रेडिट रिपोर्टिंग आणि कर्ज दरांशी संबंधित नियमांचे उल्लंघन केले.सन्मान फिनसर्व्हने आपल्या एका कर्जदाराशी संबंधित पतविषयक माहिती सेंट्रल रिपॉझिटरी ऑफ इन्फॉर्मेशन ऑन लार्ज क्रेडिट्स (CRILC) ला कळवण्यात अपयश आले. दरम्यान, हिंदुजा लेलँड फायनान्सच्या बाबतीत, सूक्ष्म वित्त कर्जाच्या दरांसाठीचे संचालक मंडळाने मंजूर केलेले धोरण योग्यरित्या लागू केले गेले नाही. या धोरणाचे उल्लंघन केल्याबद्दल कंपनीला दंड ठोठावण्यात आला.
