जबरदस्त संवादफेक आणि सहज, सामान्यांच्या मनात घर करेल असा अभिनय, रोखठोक भूमिका साकारणारे ज्येष्ठ अभिनेते नाना पाटेकर याचे गुरुवारी गोव्यातील राहत्या घरी निधन झाले. पन्नास वर्षांहून अधिक काळ चित्रपटसृष्टीत आपले मोलाचे योगदान देणाऱ्या नाना पाटेकर यांनी सर्वोच्च मानल्या जाणाऱ्या ‘राष्ट्रीय पुरस्कारां’वर तब्बल तीन वेळा आपले नाव कोरले आहे.
मराठी रंगभूमीपासून सुरुवात करून हिंदी आणि मराठी सिनेसृष्टी गाजवणारे नाना पाटेकर हे अशा मोजक्या अभिनेत्यांपैकी एक ज्यांना तीन वेळा राष्ट्रीय पुरस्कार मिळाला आहे.
नाना पाटेकर यांना मिळालेले तीन राष्ट्रीय पुरस्कार:
१. ‘परिंदा’ (१९८९) – सर्वोत्कृष्ट सहाय्यक अभिनेता –
विधू विनोद चोप्रा दिग्दर्शित ‘परिंदा’ चित्रपटात नानांनी साकारलेली मानसिक रुग्ण आणि गँगस्टर ‘अण्णा सेठ’ची भूमिका आजही हिंदुस्थानी सिनेमाच्या इतिहासातील सर्वोत्कृष्ट खलनायकी भूमिका मानली जाते. आगीची भीती असलेला, डोळ्यांत क्रूरता आणि बोलण्यात भेदक धार दाखवणाऱ्या या पात्रासाठी नानांना त्यांच्या कारकिर्दीतील पहिला राष्ट्रीय पुरस्कार (सर्वोत्कृष्ट सहाय्यक अभिनेता) मिळाला.
२. ‘क्रांतिवीर’ (१९९४) – सर्वोत्कृष्ट अभिनेता –
मेहुल कुमार दिग्दर्शित ‘क्रांतिवीर’ या चित्रपटाने नाना पाटेकर यांच्या लोकप्रियतेला शिखरावर पोहोचवले. भ्रष्टाचाराविरुद्ध पेटून उठणारा सामान्य माणूस ‘प्रताप नारायण टिळक’ त्यांनी आपल्या जबरदस्त संवादफेकीने अजरामर केला. या चित्रपटातील त्यांच्या क्रांतिकारी भूमिकेसाठी त्यांना ‘सर्वोत्कृष्ट अभिनेत्याचा राष्ट्रीय पुरस्कार’ देऊन गौरवण्यात आले. या भूमिकेसाठी त्यांना फिल्मफेअर पुरस्कारानेही सन्मानित करण्यात आले होते.
३. ‘अग्निसाक्षी’ (१९९६) – सर्वोत्कृष्ट सहाय्यक अभिनेता
पार्थो घोष दिग्दर्शित ‘अग्निसाक्षी’ चित्रपटात नाना पाटेकर यांनी एका संशयी, हिंसक आणि विकृत पतीची (विश्वनाथ) भूमिका साकारली होती. आपल्या दमदार अभिनयाने त्यांनी प्रेक्षकांच्या अंगावर काटा आणला. या नकारात्मक छटा असलेल्या आव्हानात्मक भूमिकेसाठी नानांना त्यांच्या कारकिर्दीतील तिसरा राष्ट्रीय पुरस्कार (सर्वोत्कृष्ट सहाय्यक अभिनेता) प्रदान करण्यात आला.
