आशियाई क्रीडा स्पर्धेनंतर आता पॅरा आशियाई क्रीडा स्पर्धा होणार आहेत. या पॅरा स्पर्धा जपानमधील आयची-नागोया येथे आयोजित केल्या जातील. या स्पर्धा 18 ऑक्टोबरपासून सुरू होऊन 24 ऑक्टोबरपर्यंत चालतील. हिंदुस्थानने 2026 च्या पॅरा आशियाई क्रीडा स्पर्धेसाठी 10 खेळांमधील 166 खेळाडूंना पाठवले आहे. क्रीडा मंत्रालयाने 111 पुरुष आणि 55 महिला खेळाडूंसह त्यांच्या सहाय्यक कर्मचाऱयांचा समावेश असलेल्या एकूण 275 सदस्यीय पथकाला मंजुरी दिली आहे. वादग्रस्त पॅरा-नेमबाजी प्रशिक्षक जयप्रकाश नौटियाल यांना संघातून वगळण्यात आले आहे. या स्पर्धेसाठी नौटियाल यांच्या जागी जीवन एल. राय यांची संघात निवड झाली आहे.
सर्वाधिक 63 खेळाडू पॅरा-ऍथलेटिक्स स्पर्धांमधील आहेत. हिंदुस्थान पॅरा बॅडमिंटनमध्ये 28 खेळाडूंसह आणि पॅरा जलतरणात 16 खेळाडूंसह स्पर्धा करेल. हिंदुस्थानी खेळाडू पॅरा नेमबाजी, पॅरा टेबल टेनिस, ब्लाइंड फुटबॉल, पॅरा पॉवरलिफ्टिंग, पॅरा ज्युडो आणि पॅरा सायकलिंगमध्येही पदकांसाठी स्पर्धा करतील. गेल्या पॅरा आशियाई क्रीडा स्पर्धेत हिंदुस्थानने 27 सुवर्ण पदकांसह एकूण 108 पदके जिंकली होती.
पॅरालिम्पिक चॅम्पियन प्रमोद भगत आणि भावना पटेल उद्घाटन समारंभात ध्वजवाहक म्हणून हिंदुस्थानच्या संघाचे नेतृत्व करतील. हिंदुस्थानच्या पॅरा बॅडमिंटनपटूंपैकी एक असलेल्या प्रमोदने 2014 ते 2023 दरम्यान दोन सुवर्ण आणि चार कांस्य पदकांसह सहा आशियाई पॅरा गेम्स पदके जिंकली. हिंदुस्थानच्या अव्वल पॅरा टेबल टेनिसपटूंपैकी एक असलेल्या भावनाने 2018 ते 2023 दरम्यान एक रौप्य आणि एक कांस्य पदकासह दोन आशियाई पदके जिंकली.
सायकलपटूंच्या कामगिरीनंतरही मंत्रालयाने शेवटच्या क्षणी कोणताही बदल न करता, संघात निवडलेल्यांमध्ये सर्वोत्तम कामगिरी करणाऱया पॅरालिम्पियन अर्शद शेखची निवड केली. हिंदुस्थान सायकलिंग फेडरेशन आणि हिंदुस्थान पॅरालिम्पिक समितीने इतर सहा जणांची निवड केली होती, परंतु निकषांचे पालन न केल्यामुळे त्यांचा समावेश करण्यात आला नाही.
टेबल टेनिस संघात पॅरालिम्पिक रौप्यपदक विजेती भावना पटेलचा समावेश आहे. 28 सदस्यीय बॅडमिंटन संघाला मंजुरी देण्यात आली असून त्यामध्ये माजी जागतिक क्रमवारीत अव्वल आणि टोकियो पॅरालिम्पिक सुवर्णपदक विजेता प्रमोद भगत आणि पॅरालिम्पिक रौप्यपदक विजेता सुहास यतिराज यांचा समावेश आहे.
पॅरालिम्पिक खेळांमध्ये दोन सुवर्णपदके जिंकणारी हात नसलेली पॅरा-तिरंदाज शीतल देवीदेखील चर्चेत असेल. तिच्यासोबत 18 वर्षीय पायल नाग असेल, जिने या वर्षी बँकॉक येथे झालेल्या वर्ल्ड पॅरा आर्चरी सीरिजमध्ये शीतलला पराभूत केले होते. नेमबाजी संघात पॅरालिम्पिक सुवर्णपदक विजेत्या अवनी लेखरा आणि मोना अग्रवाल यांचा समावेश आहे. मोनाने जागतिक अजिंक्यपद स्पर्धेत रौप्य पदक जिंकून लॉस एंजेलिस ऑलिम्पिकसाठी पात्रता मिळवली आहे.
