ओडिशाच्या कंधमाल जिल्ह्यातील एका 22 वर्षीय महिलेने बेरहामपूर येथील शासकीय एमकेसीजी वैद्यकीय महाविद्यालयात एका अनोख्या बाळाला जन्म दिला आहे. विशेष म्हणजे या जुळ्या मुलांना दोन डोकी, दोन मान आणि एकच धड आहे. जन्माच्या वेळी या बाळांचे एकत्रित वजन 2.250 किलोग्रॅम होते. मात्र, दोन्ही मुलांची प्रकृती अत्यंत गंभीर असून त्यांना सध्या नवजात अतिदक्षता विभागात डॉक्टरांच्या विशेष देखरेखीखाली ठेवण्यात आले आहे.
एमकेसीजी मेडिकल कॉलेज आणि हॉस्पिटलमधील बालरोग शस्त्रक्रिया विभागाचे प्रमुख डॉ. मानस रंजन साहू यांनी या दुर्मिळ प्रकरणाबाबत माहिती देताना सांगितले की, या दोन मुलांची शरीरे अनेक बाबतीत वेगळी असली, तरी त्यांचे काही महत्त्वाचे अवयव समान आहेत. त्यांना दोन डोकी आणि दोन मान आहेत, तर त्यांचे धड एकच असून पाठीच्या कण्याला दोन हाडे आहेत. विशेष म्हणजे दोन्ही मुलांचे हृदय आणि यकृत एकच आहे. तसेच त्यांचे हात, पाय आणि जनन-मूत्र प्रणाली देखील एकच आहे. मुलांची बाह्य जननेंद्रिये पुरुषांसारखी दिसतात. मात्र, त्यांना गुदद्वार नाही. ही अतिशय दुर्मिळ आणि गुंतागुंतीची वैद्यकीय स्थिती असून, ही सामायिक इंद्रिये मुलांवर उपचार करताना डॉक्टरांसमोर मोठे आव्हान निर्माण करत आहेत. डॉ. मानस रंजन साहू यांच्या मते, दोन्ही मुलांना श्वास घेण्यास खूप त्रास होत असून त्यांची आरोग्य स्थिती पाहता जगण्याची शक्यता खूपच कमी मानली जात आहे. सध्या एनआयसीयूमध्ये त्यांच्यावर बारकाईने लक्ष ठेवले जात आहे.
एमकेसीजी वैद्यकीय महाविद्यालय आणि रुग्णालयाच्या अधीक्षक डॉ. सुदीपा दास यांनी सांगितले की, या मुलांवर उपचार करण्यासाठी डॉक्टरांचे एक विशेष पथक तयार करण्यात आले आहे. वैद्यकीय महाविद्यालय आणि रुग्णालयाच्या इतिहासात बहुधा अशा प्रकारची ही पहिलीच घटना आहे. डॉक्टरांचे पथक मुलांच्या आरोग्याच्या स्थितीनुसार त्यांच्यावर उपचार करत असून, त्यांना श्वास घेताना येत असलेल्या अडचणी आणि सामायिक अवयवांशी संबंधित गुंतागुंतीवर विशेष लक्ष केंद्रित केले जात आहे. ही एक अत्यंत दुर्मिळ वैद्यकीय स्थिती आहे. काही विशिष्ट प्रकरणांमध्ये शस्त्रक्रियेद्वारे त्यांना वेगळे करणे शक्य होते, मात्र जेव्हा हृदयासारखे अत्यंत महत्त्वाचे अवयव सामायिक असतात, तेव्हा उपचार प्रक्रिया अत्यंत गुंतागुंतीची ठरते असेही डॉक्टर म्हणाले.
