चीनसमोर पंतप्रधान नरेंद्र मोदी यांनी ‘नियोजित पद्धतीने शरणागती’ पत्करल्याचा आरोप काँग्रेसने रविवारी केला. चीनसोबतची हिंदुस्थानची व्यापार तूट अभूतपूर्व पातळीवर पोहोचल्याचा दावाही काँग्रेसने केला आहे.
चीनचे राष्ट्राध्यक्ष शी जिनपिंग आणि पंतप्रधान नरेंद्र मोदी यांच्यात झालेल्या भेटीच्या दुसऱ्याच दिवशी काँग्रेस नेते जयराम रमेश यांनी पंतप्रधान मोदी यांना चार प्रश्न विचारले. गलवान संघर्षानंतर चीनला ‘क्लीन चिट’ देणाऱ्या मोदींच्या वक्तव्यापासून ते ‘ऑपरेशन सिंदूर’दरम्यान चीन-पाकिस्तान संबंधांबाबत हिंदुस्थानच्या भूमिकेत कथित बदल होऊ दिल्यापर्यंतच्या मुद्द्यांचा यात समावेश होता.
‘क्लीन चिट’मुळे हिंदुस्थानची भूमिका कमकुवत झाली का?
जयराम रमेश यांनी मोदींना उद्देशून प्रश्न उपस्थित केला की, “१९ जून २०२० रोजी तुम्ही चीनला दिलेल्या प्रसिद्ध ‘क्लीन चिट’मुळे हिंदुस्थानची भूमिका कमकुवत झाली नाही का?” यावेळी त्यांनी मोदींच्या ‘ना कोणी आमच्या सीमेत घुसले आहे, ना कोणी घुसलेले आहे’ या वक्तव्याचा संदर्भ दिला.
गलवान खोऱ्यात जून २०२० मध्ये हिंदुस्थान आणि चिनी सैनिकांमध्ये झालेल्या हिंसक संघर्षात २० भारतीय जवानांचा मृत्यू झाला होता. या पार्श्वभूमीवर चीनला दिलेल्या कथित ‘क्लीन चिट’वर काँग्रेसने प्रश्न उपस्थित केला.
लडाख, अरुणाचल प्रदेशातील हालचालींचाही आरोप
काँग्रेसने पंतप्रधान मोदींवर लडाख आणि अरुणाचल प्रदेशातील चीनच्या कथित भूभागविषयक हालचालींना ‘परवानगी’ दिल्याचा आरोप केला. पूर्व लडाखमधील काही भागांमध्ये हिंदुस्थानींना असलेले गस्त घालण्याचे आणि चराईचे अधिकार यापूर्वी ‘सोडून देण्यात आल्याचा’ दावा रमेश यांनी केला.
दरम्यान, अरुणाचल प्रदेशातील काही भागांमध्ये चीनकडून कथित घुसखोरीच्या बातम्या समोर येत असल्याचेही त्यांनी नमूद केले.
ब्रह्मपुत्रेवरील महाधरणाबाबत चिंता
ब्रह्मपुत्रा नदीच्या ‘ग्रेट बेंड’ परिसरात चीनकडून ६० हजार मेगावॅट क्षमतेच्या मेदोग महाधरणाचे काम पुढे नेले जात असल्याचा आरोपही रमेश यांनी केला. या प्रकल्पामुळे भारताच्या जलसुरक्षेला धोका निर्माण होऊ शकतो, अशी चिंता काँग्रेसने व्यक्त केली.
‘मेक इन इंडिया’वरही काँग्रेसचा सवाल
चीनसोबतची हिंदुस्थानची व्यापार तूट अभूतपूर्व पातळीवर पोहोचल्याचा दावा काँग्रेसने केला. या पार्श्वभूमीवर ‘मेक इन इंडिया’ आणि ‘चीनमधून आयात’ हे एकाच नाण्याच्या दोन बाजू झाल्या आहेत, अशी टीका जयराम रमेश यांनी केली. चीनसोबतच्या संबंधांबाबत सरकारची भूमिका, सीमाविषयक धोरण आणि वाढती व्यापार तूट यावर काँग्रेसने पंतप्रधान मोदींकडे स्पष्टीकरण मागितले आहे.
