आजच्या काळात कृत्रिम बुद्धिमत्तेमुळे (AI) अनेक कामे सोपी झाली आहेत. प्रवासाचे नियोजन करतानाही AI ची मदत घेता येते. हॉटेल शोधणे, फिरण्यासाठी ठिकाणे निवडणे, खाण्यापिण्याच्या ठिकाणांची माहिती मिळवणे आणि संपूर्ण सहलीचे नियोजन करणे यांसारखी कामे AI च्या मदतीने सहज करता येऊ शकतात. प्रवासाचे नियोजन करताना अनेकदा तासन्तास खर्च होतात. हॉटेल शोधणे, नकाशावर पर्यटनस्थळे निवडणे आणि जेवणासाठी योग्य ठिकाणे शोधणे ही कामे कधीकधी गोंधळात टाकणारी ठरतात. मात्र, आता AI मुळे ही प्रक्रिया अधिक सोपी झाली आहे.
AI चा योग्य वापर केल्यास प्रवास अधिक चांगला आणि आनंददायी होऊ शकतो. त्यासाठी काही गोष्टी लक्षात ठेवणे गरजेचे आहे.
AI टूलला केवळ ‘जयपूरची सहल आखून दे’ असे सांगून उपयोग होणार नाही. त्याऐवजी प्रवासाचे बजेट, तारखा, किती दिवस थांबणार आहात आणि कोणासोबत प्रवास करणार आहात, याची माहिती द्या.
तुम्हाला खाद्यपदार्थ, ऐतिहासिक वास्तू, खरेदी किंवा गर्दीपासून दूर असलेली शांत ठिकाणे यांपैकी काय आवडते, हेही सांगा.
उदाहरणार्थ, कुटुंबासोबत तीन दिवसांच्या सहलीचे नियोजन करत असाल, तर कमी प्रवास करावा लागेल आणि प्रत्येक ठिकाणी पुरेसा वेळ घालवता येईल, अशी योजना तयार करण्यास AI ला सांगा.
तुम्ही जितकी स्पष्ट माहिती द्याल, तितके अधिक उपयुक्त नियोजन मिळण्यास मदत होईल.
कोणती ठिकाणे कोणत्या दिवशी पाहावीत, याचे नियोजन AI च्या मदतीने करता येते. तुम्ही ज्या हॉटेलमध्ये राहणार आहात, त्याचे ठिकाण सांगून आसपासची पर्यटनस्थळे एकत्रितपणे पाहण्याचा मार्ग आखण्यास AI ला सांगा.
यामुळे विनाकारण प्रवास करण्यात जाणारा वेळ वाचू शकतो. तसेच एखाद्या दिवशी कमी फिरायचे असल्यास पर्यायी नियोजनही तयार करता येते.
वैयक्तिक आवडीनुसार सहलीचे नियोजन आणि विमान किंवा हॉटेलच्या रिअल टाइम शिफारशी देणाऱ्या AI आधारित सेवांवरही संशोधन सुरू आहे.
AI ला ‘सर्वांत चांगले हॉटेल शोध’ असे सांगण्याऐवजी तुमचे बजेट, पसंतीचा परिसर, खोलीच्या गरजा, सार्वजनिक वाहतुकीपासूनचे अंतर आणि पार्किंग किंवा नाश्त्याची सुविधा हवी आहे का, याची माहिती द्या.
या माहितीच्या आधारे AI हॉटेलची यादी तयार करण्यास आणि त्यांच्यातील फरक समजून घेण्यास मदत करू शकते.
मात्र, हॉटेल बुक करण्यापूर्वी अंतिम किंमत, उपलब्धता, बुकिंग रद्द करण्याचे नियम आणि अलीकडील ग्राहकांच्या प्रतिक्रिया थेट बुकिंग प्लॅटफॉर्मवर तपासून घ्या.
प्रवासाच्या मार्गावर चांगली खाद्यपदार्थांची ठिकाणे शोधण्यासाठी AI चा वापर करता येतो. स्थानिक खाद्यसंस्कृती आणि जवळपास अनुभवता येणाऱ्या खास गोष्टींची माहितीही AI देऊ शकते.
एखादे प्रसिद्ध पर्यटनस्थळ गर्दीचे असेल, तर त्याच्या आसपास कमी गर्दी असलेली ठिकाणे सुचवण्यास AI ला सांगा.
यामुळे नेहमीच्या पर्यटन यादीत नसलेली काही वेगळी ठिकाणेही शोधता येऊ शकतात.
AI प्रवासाचे नियोजन वेगाने करण्यास मदत करू शकते. मात्र, त्याने दिलेली प्रत्येक माहिती अचूक असेलच असे नाही.
रेस्टॉरंटच्या वेळा बदलू शकतात, पर्यटनस्थळे देखभालीसाठी बंद असू शकतात आणि वाहतुकीचे वेळापत्रकही बदलत असते. काही सूचना जुन्या किंवा चुकीच्या असू शकतात.
त्यामुळे प्रवासाला निघण्यापूर्वी अधिकृत पर्यटन वेबसाइट, हॉटेलचे संकेतस्थळ आणि वाहतूक सेवा पुरवणाऱ्या कंपन्यांच्या वेबसाइटवर महत्त्वाची माहिती तपासून घ्या.
AI हे प्रवासाचे नियोजन करण्यासाठी मदत करणारे साधन आहे; अंतिम निर्णय घेण्याची जबाबदारी प्रवाशाचीच असते.
