महाराष्ट्रातील सुमारे 5.5 लाख विद्यार्थ्यांनी आपले आधार कार्ड अजूनही अपडेट केलेले नाही. मात्र, आधार अपडेट झाले नसले तरी, यामुळे कोणत्याही विद्यार्थ्याला सरकारी योजनांच्या फायद्यापासून वंचित ठेवले जाणार नाही, अशी ग्वाही राज्याचे शालेय शिक्षणमंत्री यांनी दिली आहे. विधानपरिषदेत एका प्रश्नाला उत्तर देताना त्यांनी ही माहिती दिली.
विधिमंडळाचे पावसाळी अधिवेशन सुरू असून विधानपरिषदेत विद्यार्थ्यांच्या आधार अपडेटवर प्रश्न उपस्थित केला गेला. यावर उत्तर देताना शिक्षणमंत्री म्हणाले, मे 2026 पर्यंतच्या आकडेवारीनुसार राज्यातील शहरी आणि ग्रामीण भागातील 18 वर्षांखालील सुमारे 5.5 लाख विद्यार्थ्यांचे आधार कार्ड अपडेट झालेले नाही. परंतु, यामुळे विद्यार्थ्यांच्या शिक्षणात कोणतीही अडचण येणार नाही याची काळजी सरकार घेत असल्याचे त्यांनी सांगितले.
विद्यार्थ्यांचे आधार कार्ड अपडेट नसेल तर विद्यार्थ्यांना शाळेत प्रवेश मिळणे, शिष्यवृत्ती, खात्यात थेट पैसे जमा होणे, परीक्षेचे फॉर्म भरणे किंवा बँक खाते लिंक करणे अशा शैक्षणिक प्रक्रियेत कोणतीही अडचण येत नाही. विद्यार्थ्यांचे आधार कार्ड तयार करण्यासाठी आणि ते लिंक करण्यासाठी शाळांमध्ये विशेष कॅम्प (Camps) आयोजित केले जात आहेत. शाळा आणि तालुका पातळीवर यासाठी सातत्याने प्रयत्न सुरू असल्याचे त्यांनी स्पष्ट केले.
तसेच, जोपर्यंत हे आधार अपडेट करण्याचे काम पूर्ण होत नाही, तोपर्यंत राज्यातील एकही विद्यार्थी कोणत्याही सरकारी सुविधेपासून किंवा शैक्षणिक संधीपासून वंचित राहणार नाही, अशा कडक सूचना शिक्षण विभागाने दिल्या आहेत.
