झारखंडच्या खुंटी जिल्ह्यातील तिलमी जंगलात रविवारी पोलीस आणि बंदी घातलेल्या पीएलएफआयच्या संघटनेत चकमक झाली. या चकमकीत पीएलएफआय संघटनेचा वरिष्ठ कमांडर श्रावण दास जखमी झाला आहे. कारवाईत सहा नक्षलवाद्यांना अटक करण्यात आली आहे. जखमी दासला रांची येथील रिम्स रुग्णालयात उपचारासाठी दाखल करण्यात आले आहे.
टीव्ही 9 भारतवर्षने दिलेल्या वृत्तानुसार, पीएलएफआयचे सदस्य तिलमी जंगलात मोठा कट रचण्याच्या तयारीत असल्याची गुप्त माहिती पोलिसांना मिळाली होती. या गुप्त माहितीच्या आधारे झरियागड आणि कर्रा पोलिसांनी संयुक्तपणे छापा टाकला. पोलिसांना पाहताच नक्षलवाद्यांनी गोळीबार सुरू केला. प्रत्युत्तरादाखल पोलिसांनी केलेल्या गोळीबारात कमांडर श्रवण दास जखमी झाला. या कारवाईत पोलिसांनी श्रावण दास गटाच्या सहा सदस्यांना अटक केली. अटक केलेल्या दहशतवाद्यांमध्ये सामू धोधराई, सुदर्शन सोय, सलीम बोद्रा, हर्षित गुडीया, उमर खान उर्फ नील खान आणि विष्णू मांझी यांचा समावेश आहे.
अटक केलेल्या नक्षलवाद्यांकडून चार पिस्तूल, अनेक गावठी पिस्तूल आणि एक डझनहून अधिक जिवंत काडतुसे जप्त करण्यात आली आहेत. घटनास्थळावरून अनेक गुन्हेगारी कागदपत्रे आणि डायरी जप्त करण्यात आली आहे. या डायरीत परिसरातील अनेक कंत्राटदारांचे मोबाईल क्रमांक आणि संभाव्य घटनांचा तपशीलवार वृत्तांत होता.
