रक्षाबंधनाचा सण २८ ऑगस्टला साजरा केला जाणार आहे. सणाला आता काही दिवसच शिल्लक असल्याने अनेक जण त्वचेची विशेष काळजी घेण्यास सुरुवात करतात. रक्षाबंधनाच्या दिवशी चेहरा ग्लोइंग आणि फ्रेश दिसावा, अशी प्रत्येकाची इच्छा असते. अशावेळी घरात सहज उपलब्ध असलेल्या काही नैसर्गिक पदार्थांपासून तयार केलेला फेसपॅक उपयोगी ठरू शकतो.
आपल्या प्रत्येकाच्या घरांमध्ये त्वचेच्या काळजीसाठी हळदीचा वापर पूर्वीपासून केला जातो. त्याचप्रमाणे दही आणि बेसनाचाही त्वचेसाठी वापर केला जातो. या पदार्थांपासून फेसपॅक तयार करण्यासाठी एक चमचा दही, चिमूटभर हळद, अर्धा चमचा बेसन आणि एक छोटा चमचा मध घ्यावा. शक्य असल्यास शुद्ध कस्तुरी हळदीचा वापर करण्याचा सल्ला दिला जातो.
हा फेसपॅक तयार करण्यासाठी सर्व पदार्थ चांगले मिसळून त्याची पातळ थर चेहऱ्यावर तसेच मानेवर लावावी. साधारण २० मिनिटे हा फेसपॅक ठेवून नंतर साध्या पाण्याने चेहरा धुवावा. हा फेसपॅक रात्री लावण्याचा सल्ला दिला जातो. मात्र, त्वचेच्या प्रकारानुसार त्याचा वापर करणे महत्त्वाचे आहे. संवेदनशील त्वचा असल्यास प्रथम छोट्या भागावर पॅच टेस्ट करणे योग्य ठरते.
त्वचेची काळजी घेताना सनस्क्रीनचा वापरही महत्त्वाचा आहे. सकाळी घराबाहेर पडताना SPF 30 किंवा त्यापेक्षा जास्त असलेले सनस्क्रीन लावावे. सूर्यप्रकाशामुळे टॅनिंगसोबतच त्वचेचे नुकसान होऊ शकते.
फेसपॅक धुतल्यानंतर त्वचेला मॉइश्चरायझर किंवा त्वचेला अनुकूल असलेले अॅलोवेरा जेल लावता येऊ शकते. मात्र, कोणतेही नवीन उत्पादन वापरण्यापूर्वी त्वचेवर त्याचा परिणाम तपासणे आवश्यक आहे. नैसर्गिक पदार्थ प्रत्येकाच्या त्वचेला सारखेच अनुकूल असतील असे नाही.
