हिंदुस्थानची ऑलिम्पिक पदक विजेती महिला बॉक्सर लव्हलिना बोरगोहेन हिने 29 वा वाढदिवस दणक्यात साजरा केला आहे. जपानमध्ये सुरू असलेल्या आशियाई क्रीडा स्पर्धेत लव्हलिना हिने शुक्रवारी 75 किलो वजनी गटाच्या अंतिम लढतीत चीनच्या झियी बायो हिचा 5-0 असा धुव्वा उडवत सुवर्णपदकावर नाव कोरले. विशेष म्हणजे आशियाई क्रीडा स्पर्धेच्या इतिहासात सुवर्णपदक जिंकणारी ती मेरी कॉम हिच्यानंतर दुसरीच महिला बॉक्सर ठरली आहे. याआधी 2023 मध्ये पार पडलेल्या आशियाई क्रीडा स्पर्धेत लव्हलिना हिला रौप्यपदकावर समाधान मानावे लागले होते.
अंतिम सामन्यात लव्हलिनासमोर चीनच्या बाओचे आव्हान होते. दोन्ही खेळाडूंमध्ये सुरुवातीपासूनच चुरशीची लढत पाहायला मिळाली. पहिल्या फेरीत लव्हलिनाने संयमी खेळ करत 3-2 अशी आघाडी घेतली. दुसऱ्या फेरीत बाओने आक्रमक पवित्रा घेत लव्हलिनावर दबाव निर्माण करण्याचा प्रयत्न केला. त्यामुळे ऑलिम्पिक पदक विजेत्या लव्हलिनाला काही काळ बचावात्मक खेळ करावा लागला. मात्र, दबावाखालीही तिने आपला संयम ढळू दिला नाही. अचूक पंच आणि नियंत्रित खेळाच्या जोरावर तिने दुसरी फेरी 4-1 अशी जिंकली. त्यामुळे अंतिम फेरीपूर्वी तिची आघाडी अधिक भक्कम झाली.
सुवर्णपदक अगदी जवळ आले असताना लव्हलिनाने तिसऱ्या फेरीतही सावध आणि प्रभावी खेळ केला. बाओने पुनरागमन करण्याचा प्रयत्न केला; मात्र लव्हलिनाच्या बचावासमोर आणि प्रतिहल्ल्यांसमोर तिचे प्रयत्न अपुरे ठरले. तिसरी फेरीही लव्हलिनाने 4-1 अशी जिंकली. अखेरीस पंचांनी 5-0 असा निर्विवाद निकाल लव्हलिनाच्या बाजूने दिला आणि तिने ऐतिहासिक सुवर्णपदकाला गवसणी घातली.
Indian boxer Lovlina Borgohain wins a boxing gold medal in the women’s 75kg category at the Asian Games 2026 https://t.co/nVBU9JjhoG pic.twitter.com/0FQcFuUbbT
— ANI (@ANI) October 2, 2026
दरम्यान, अंतिम फेरीपर्यंतचा लव्हलिनाचा प्रवास आव्हानात्मक होता. उपांत्य सामन्यात तिच्यासमोर कझाकस्तानची नताल्या बोगदानोव्हा हिचे आव्हान होते. बोगदानोव्हा ही 70 किलो वजनी गटातील विद्यमान जागतिक विजेती असल्याने या लढतीकडे विशेष लक्ष लागले होते. सुरुवातीच्या फेरीत लव्हलिनाला लय गवसली नाही. ती 2-3 अशी पिछाडीवर होती.
मात्र, दुसऱ्या फेरीत तिने अधिक आक्रमक होत प्रतिस्पर्धी खेळाडूला एकामागोमाग एक ठोसे लगावत ही फेरी 5-0 अशी जिंकली. निर्णायक तिसऱ्या फेरीत बोगदानोव्हाने पुन्हा आक्रमण केले. त्याला प्रत्युत्तर देताना लव्हलिनाने बचाव आणि प्रतिहल्ल्यांचा प्रभावी वापर केला. ही फेरी बोगदानोव्हाने 3-2 अशी जिंकली; मात्र दुसऱ्या फेरीतील मोठ्या आघाडीमुळे लव्हलिनाचा विजय निश्चित झाला. पाचपैकी तीन पंचांनी तिच्या बाजूने कौल दिल्याने तिने ही लढत जिंकत सलग दुसऱ्यांदा आशियाई क्रीडा स्पर्धेच्या अंतिम फेरीत प्रवेश केला.
15 सुवर्णपदके हातातून निसटली; हिंदुस्थानी पथकाचा शतक महोत्सव साजरा होण्याची शक्यता कमीच
