दिल्लीमध्ये मुख्य निवडणूक आयुक्त ज्ञानेश कुमार यांच्या विरोधात सुरू असलेल्या आंदोलनादरम्यान राज्यसभेचे खासदार जॉन ब्रिटास यांच्यावर दिल्ली पोलिसांनी कथितपणे मारहाण केल्याचा आरोप माकपने केला आहे. मारहाणीनंतर ब्रिटास यांना रस्त्याच्या कडेला सोडण्यात आले. त्यावेळी ते जखमी अवस्थेत असल्याचा दावा पक्षाने केला आहे.
माकपने रविवारी सोशल मीडिया प्लॅटफॉर्म ‘एक्स’वर एक व्हिडिओ शेअर करत दिल्ली पोलिसांवर टीका केली. “दिल्ली पोलिसांनी सर्व मर्यादा ओलांडल्या आहेत,” असे पक्षाने पोस्टमध्ये म्हटले आहे. या व्हिडिओमध्ये जॉन ब्रिटास दिल्ली पोलिसांच्या बसजवळ बसलेले दिसत आहेत. त्यांना चालण्यासाठी आणखी एक व्यक्ती मदत करत असल्याचेही दिसते. ब्रिटास यांना उठतानाही त्रास होत असल्याचे व्हिडिओत दिसत असून, दिल्ली पोलीस कर्मचारी त्यांना रिक्षापर्यंत चालत जाण्यास मदत करत असल्याचेही दिसते.
मात्र, ब्रिटास यांना नेमकी कुठे आणि कशामुळे दुखापत झाली, हे अद्याप स्पष्ट झालेले नाही. माकपने पोलिसांवर मारहाणीचा आरोप केला असला, तरी या घटनेचा संपूर्ण घटनाक्रम आणि दुखापतीचे कारण स्वतंत्रपणे स्पष्ट झालेले नाही.
जंतरमंतरकडे जाणाऱ्या आंदोलकांना ताब्यात घेतले
कॉक्रोच जनता पार्टीने (CJP) मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आणि मतदार यादीच्या विशेष सखोल पुनरीक्षणाच्या (SIR) विरोधात आंदोलन पुकारले आहे. या आंदोलनाचा रविवारी दुसरा दिवस होता.
रविवारी कनॉट प्लेसच्या इनर सर्कल आणि राजीव चौक परिसरातून जंतरमंतरच्या दिशेने मोर्चा काढणाऱ्या अनेक आंदोलकांना सुरक्षा यंत्रणांनी ताब्यात घेतले. या आंदोलकांमध्ये जॉन ब्रिटास यांचाही समावेश होता.
Rajya Sabha MP John Brittas was brutally attacked by the Delhi Police. He was later dropped by the roadside, visibly injured and in distress.
DELHI POLICE HAS CROSSED ALL LIMITS! https://t.co/0Q5TCpi2Mj
— CPI (M) (@cpimspeak) October 11, 2026
