कपडे स्वच्छ धुतल्यानंतरही त्यातून ओलसर किंवा कुबट वास येत असेल तर त्यासाठी नेहमी डिटर्जंट जबाबदार असेलच असे नाही. वॉशिंग मशीनमध्ये कपडे जास्त भरणे, अतिरिक्त डिटर्जंट वापरणे आणि ओले कपडे बराच वेळ तसेच ठेवणे ही त्यामागची कारणे असू शकतात. कपडे धुतल्यानंतर ते स्वच्छ आणि सुगंधी असावेत, अशी प्रत्येकाची अपेक्षा असते. मात्र अनेकदा वॉशिंग मशीनमधून बाहेर काढल्यानंतरही कपड्यांमध्ये कुबट किंवा ओलसर वास जाणवतो. अशावेळी अनेक जण लगेच डिटर्जंट खराब असल्याचे समजून दुसरा डिटर्जंट वापरायला सुरुवात करतात.
मात्र कपड्यांच्या दुर्गंधीमागे धुण्याची पद्धत आणि वॉशिंग मशीनची स्वच्छता यांचाही मोठा वाटा असू शकतो.
‘जास्त डिटर्जंट म्हणजे जास्त स्वच्छता’ हा समज चुकीचा ठरू शकतो. प्रमाणापेक्षा जास्त डिटर्जंट वापरल्यास त्याचे अवशेष कपड्यांमध्ये राहू शकतात. त्यामध्ये शरीरातील तेल आणि इतर घाण अडकून राहिल्याने कपड्यांना दुर्गंधी येऊ शकते.
त्यामुळे मशीन आणि कपड्यांच्या प्रकारानुसार डिटर्जंटचे योग्य प्रमाण वापरणे महत्त्वाचे आहे.
वॉशिंग मशीनमध्ये क्षमतेपेक्षा जास्त कपडे भरल्यास पाणी आणि डिटर्जंट प्रत्येक कपड्यापर्यंत योग्य प्रकारे पोहोचत नाही. त्यामुळे कपडे पूर्णपणे स्वच्छ न धुतले जाण्याची शक्यता असते.
कपड्यांना फिरण्यासाठी पुरेशी जागा मिळेल, एवढेच कपडे मशीनमध्ये ठेवणे योग्य ठरते.
सर्व कपड्यांसाठी एकाच तापमानाचे पाणी योग्य असेलच असे नाही. नाजूक कपड्यांसाठी थंड किंवा कमी तापमानाचे पाणी योग्य ठरू शकते. दुसरीकडे टॉवेल, बेडशीट किंवा घामाने भिजलेले काही कपडे धुताना त्यांच्या केअर लेबलनुसार कोमट किंवा गरम पाण्याचा वापर केला जाऊ शकतो.
टाॅवेल, बेडशीट किंवा वर्कआउटचे कपडे धुतल्यानंतर त्यात डिटर्जंटचे अवशेष राहिल्याचे जाणवत असेल, तर अतिरिक्त रिंस सायकल उपयोगी ठरू शकते. यामुळे उरलेले डिटर्जंट आणि काही घाण अधिक चांगल्या प्रकारे निघण्यास मदत होते.
धुतलेले कपडे मशीनमध्येच ठेवू नका. ही सर्वात सामान्य चूक आहे. धुलाई पूर्ण झाल्यानंतर कपडे बराच वेळ मशीनमध्ये ओलेच पडून राहिल्यास त्यातून कुबट वास येऊ शकतो. त्यामुळे धुलाई पूर्ण झाल्यानंतर शक्य तितक्या लवकर कपडे बाहेर काढून वाळत घालणे किंवा ड्रायरमध्ये ठेवणे चांगले.
कपडे स्वच्छ करणाऱ्या मशीनचीही नियमित स्वच्छता करणे आवश्यक आहे. डिटर्जंटचे अवशेष, शरीरातील तेल, घाण आणि पाण्यातील खनिजे मशीनच्या आतील भागात जमा होऊ शकतात. त्यामुळे मशीनमधूनही दुर्गंधी येऊ शकते.
मशीनमध्ये ‘Self Clean’ किंवा ‘Tub Clean’ सायकल असल्यास निर्मात्याच्या सूचनेनुसार ती नियमित वापरा. मशीनच्या मॅन्युअलमध्ये दिलेल्या सूचनांनुसार योग्य क्लीनिंग प्रक्रिया करा.
कपडे धुतल्यानंतर दुर्गंधी येत असेल तर लगेच डिटर्जंट बदलण्याऐवजी मशीनमध्ये कपडे जास्त भरले जात नाहीत ना, डिटर्जंटचे प्रमाण योग्य आहे का, कपडे धुतल्यानंतर लगेच बाहेर काढले जातात का आणि मशीन स्वच्छ आहे का, हे तपासा. या छोट्या गोष्टींमध्ये बदल केल्याने कपड्यांच्या वासाची समस्या कमी होण्यास मदत होऊ शकते.
