फ्रान्सचे राष्ट्राध्यक्ष इमॅन्युएल मॅक्रॉन यांनी अमेरिकेचे राष्ट्राध्यक्ष डोनाल्ड ट्रम्प यांच्या गाझामध्ये शांतता प्रस्थापित करण्याच्या दाव्यावर प्रश्नचिन्ह उपस्थित केले आहे. संयुक्त राष्ट्र महासभेत बोलताना मॅक्रॉन म्हणाले की, प्रत्यक्ष परिस्थिती ट्रम्प यांच्या दाव्याप्रमाणे राजनैतिक यश दर्शवत नाही. त्यांनी विशेषतः गाझामधील मानवतावादी मदतीच्या प्रवेशाचा मुद्दा उपस्थित केला. ते म्हणाले की, शांततेच्या दाव्यांनंतरही, मानवतावादी मदत पुन्हा सुरू झालेला नाही.
राष्ट्राध्यक्ष मॅक्रॉन म्हणाले की, जर जग गाझामधील परिस्थितीबाबत निष्क्रिय राहिले, तर त्यांच्या विश्वासार्हतेवर प्रश्नचिन्ह निर्माण होईल. संयुक्त राष्ट्रातील आपल्या भाषणादरम्यान ते म्हणाले की, काही जण तथाकथित शांततेचा उत्सव साजरा करत आहेत, परंतु गाझामधील मानवतावादी मदत पूर्ववत झालेली नाही. जग केवळ परिस्थिती पाहत राहणार आहे का? असा सवालही त्यांनी केला.
मॅक्रॉन यांनी फ्रान्सच्या पॅलेस्टाईनला मान्यता देण्याच्या निर्णयाचेही समर्थन केले. त्यांनी वेस्ट बँकमधील पॅलेस्टिनींवरील हिंसाचाराचा मुद्दा उपस्थित केला. मॅक्रॉन म्हणाले की, तिथे दररोज उल्लंघन होत आहे. हमासने वेस्ट बँकमध्ये कधीही काम केले नसल्याने, हे सर्व कोणाच्या नावाने घडत आहे, असा प्रश्न त्यांनी उपस्थित केला.
आपल्या संयुक्त राष्ट्र महासभेतील भाषणात, मॅक्रॉन यांनी बहुपक्षीयतेचे समर्थन केले. ते म्हणाले की, जगासमोर बळ आणि सक्तीवर चालणारी व्यवस्था किंवा एक सुसंस्कृत आंतरराष्ट्रीय समाज यांपैकी एकाची निवड करण्याचा पर्याय आहे. त्यांनी देशांना संयुक्त राष्ट्रांच्या पाठीशी उभे राहण्याचे आवाहन केले आणि म्हणाले की, कोणालाही मनमानीपणे वागण्याची परवानगी देणारी व्यवस्था जग स्वीकारू शकत नाही,असे ते म्हणाले.
मॅक्रॉन यांच्या वक्तव्यानंतर, व्हाइट हाऊसने ट्रम्प यांच्या गाझा योजनेचा बचाव केला. व्हाइट हाऊसच्या प्रवक्त्या ॲना केली म्हणाल्या की, ट्रम्प यांनी इस्रायल आणि हमास यांच्यातील युद्ध संपवले, जिवंत ओलिसांची सुटका सुनिश्चित केली आणि ठार झालेल्यांचे मृतदेह त्यांच्या कुटुंबीयांना परत केले. ट्रम्प आता गाझामधील शांततेसाठीच्या २०-कलमी योजनेच्या अंमलबजावणीचे नेतृत्व करत आहेत. व्हाईट हाऊसने म्हटले आहे की, इतर केवळ बोलत असताना, ट्रम्प यांनी या गुंतागुंतीच्या विषयावर थेट कृती केली.
