जागतिक अर्थव्यवस्थेवर असलेला दबाव, जागतिक अशांतता आणि शेअर बाजारातील घसरणीमुळे रियल इस्टेट क्षेत्रालाही फटका बसला आहे. त्यामुळे हे क्षेत्र मंदीत असण्याची शक्यता वर्तवण्यात येत होती. मात्र, नुकत्याच उघड झालेल्या माहितीमुळे मुंबईत घरांची विक्रमी विक्री झाली आहे.
मुंबईच्या मालमत्ता बाजारपेठेबद्दल घर खरेदीदारांचा विश्वास वाढल्याचे दिसत आहे. २०२६ च्या पहिल्या सहामाहीत (जानेवारी ते जून) मुंबईतील घर नोंदणीने १३ वर्षांचा विक्रम मोडला आहे. रिअल इस्टेट सल्लागार कंपनी नाईट फ्रँक इंडियाच्या ताज्या अहवालानुसार, या वर्षाच्या पहिल्या सहा महिन्यांत मुंबईत एकूण ८०,२२१ मालमत्तांची नोंदणी झाली असून, महाराष्ट्र सरकारला मुद्रांक शुल्काच्या रूपात तब्बल ६,९६८ कोटींचा महसूल मिळाला आहे.
मुंबईची निवासी बाजारपेठ मंदीच्या सर्व भीतींना न जुमानता ऐतिहासिक वेगाने वाढत आहे. प्राथमिक आणि दुय्यम दोन्ही बाजारपेठांमधील या तेजीमुळे सरकारी तिजोरीत तब्बल ₹६,९६८ कोटी जमा झाले आहेत, जे गेल्या वर्षीच्या याच कालावधीपेक्षा ४% अधिक आहे.
नाईट फ्रँकच्या मते, बृहन्मुंबई महानगरपालिकेच्या (बीएमसी) अखत्यारीत येणाऱ्या या शहराने २०१३ नंतरची सर्वोत्तम पहिल्या सहामाही कामगिरी नोंदवली आहे. प्राथमिक आणि दुय्यम दोन्ही व्यवहारांचा समावेश केल्यास, एकूण नोंदणीत वार्षिक ६ टक्क्यांनी वाढ झाली आहे. या व्यवहारांमधून मिळणाऱ्या मुद्रांक शुल्काच्या संकलनातही वार्षिक ४ टक्क्यांनी वाढ झाली आहे.
जून २०२६ मध्ये मुंबईत १३,३०२ मालमत्तांची नोंदणी होण्याची शक्यता आहे, जी गेल्या वर्षीच्या तुलनेत १५ टक्के वाढ आहे. गेल्या १४ वर्षांतील जून महिन्यातील मालमत्ता नोंदणीची ही सर्वाधिक संख्या असेल, जी शहरातील निवासी बाजारपेठेची सातत्यपूर्ण मजबुती दर्शवते.
महाराष्ट्र सरकारला जून महिन्यात मुद्रांक शुल्काच्या स्वरूपात १,०७७ कोटी मिळण्याची अपेक्षा आहे, जी मागील वर्षाच्या तुलनेत ४ टक्क्यांनी अधिक आहे. हे बदलत्या व्यवहार पद्धती दर्शवते, ज्यात गेल्या वर्षीच्या तुलनेत नोंदणीमध्ये मध्यम-वर्गीय विभागाचा वाटा तुलनेने जास्त आहे. मे २०२६ च्या तुलनेत, जूनमध्ये मासिक आधारावर मालमत्ता नोंदणीत ७ टक्के आणि मुद्रांक शुल्क संकलनात २ टक्क्यांनी वाढ अपेक्षित आहे. त्यामुळे मुंबईत रियल इस्टेट क्षेत्र तेजीत असल्याचे दिसून येत आहे.
