जपानच्या उत्तर किनारपट्टीला गुरुवारी भूकंपाचा जोरदार धक्का बसला आहे. असे असले तरी देशाच्या हवामान खात्याने सांगितले की त्सुनामीचा कोणताही धोका नाही.
जपानच्या हवामान खात्याने दिलेल्या माहितीनुसार, या भूकंपाची तीव्रता ७.२ रिश्टर स्केल होती आणि तो इवातेच्या पूर्व किनारपट्टीवर त्याचा केंद्र बिंदू सांगण्यात येत आहे. सुरुवातीला ही तीव्रता ६.९ नोंदवण्यात आली होती, ज्यामध्ये नंतर सुधारणा करण्यात आली. हा भूकंप जमिनीखाली सुमारे ५० किलोमीटर खोल भागात झाला, असे हवामान खात्याने सांगितले. अमेरिकेच्या भूगर्भीय सर्वेक्षणाने देखील भूकंपाची तीव्रता ६.९ असल्याचे सांगितले आहे.
हा भूकंपाचा धक्का अशा भागात बसला आहे जिथे गेल्या काही महिन्यांत वारंवार शक्तिशाली भूकंपांची नोंद झाली आहे, ज्यामध्ये डिसेंबर महिन्यात एका आठवड्यासाठी ‘महा-भूकंप’ सतर्कतेचा इशारा देणाऱ्या भूकंपाचाही समावेश आहे.
गुरुवारी सकाळी कामावर जाण्याच्या धावपळीच्या वेळी जपानच्या ईशान्य भागाला बसलेल्या या भूकंपाचे सौम्य धक्के टोक्योमध्येही जाणवले. सरकारच्या मुख्य प्रवक्त्या मिनोरू किहारा यांनी दिलेल्या माहितीनुसार, तात्काळ कोणतीही जीवितहानी किंवा मालमत्तेचे नुकसान झाल्याचे वृत्त नाही.
पंतप्रधान साने ताकाईची यांनी टोक्योमध्ये पत्रकारांशी बोलताना सांगितले की, त्यांचे सरकारचे आपत्कालीन पथक माहितीचा अंदाज घेत आणि गरज पडल्यास मदत कार्याची तयारी करत असताना, ‘लोकांच्या जीवाला पहिले प्राधान्य देत आहे.’ त्यांनी बाधित भागातील नागरिकांना संभाव्य धक्क्यांपासून सावध राहण्याचे आवाहन केले.
