अयोध्येतील राम मंदिरातील देणग्यांमध्ये कथित गैरव्यवहार झाल्याच्या वादावरून समाजवादी पक्षाचे अध्यक्ष अखिलेश यादव यांनी भाजपवर जोरदार हल्लाबोल केला आहे. देणग्यांच्या व्यवस्थापनात पारदर्शकतेचा अभाव असल्याचा आरोप करताना त्यांनी अयोध्येत जमिनी बळकावल्याच्या कथित प्रकरणांचाही मुद्दा उपस्थित केला आहे.
लखनौ येथे पक्षाच्या मुख्यालयात आयोजित पत्रकार परिषदेत बोलताना अखिलेश यादव यांनी राम मंदिरातील देणग्यांबाबत अनेक प्रश्न अनुत्तरित असल्याचा दावा केला. कथित गैरव्यवहाराशी संबंधित सीसीटीव्ही फुटेज गायब असल्याचा आरोप करत त्यांनी देणग्या, अर्पण केलेली रक्कम आणि इतर निधीचा हिशेब जनतेसमोर का मांडला जात नाही, असा सवाल उपस्थित केला.
राम मंदिरातील देणग्यांचा अपहार आणि श्रीराम जन्मभूमी तीर्थ क्षेत्र ट्रस्टच्या आर्थिक व्यवहारांबाबत करण्यात आलेल्या आरोपांच्या चौकशीसाठी उत्तर प्रदेश सरकारने 13 जून रोजी विशेष तपास पथक (एसआयटी) स्थापन केले आहे. या पार्श्वभूमीवर यादव यांनी सरकार आणि ट्रस्टवर निशाणा साधला.
अखिलेश यादव यांनी अयोध्येतील कथित जमीन घोटाळ्यांचाही मुद्दा उपस्थित केला. अयोध्येत जमीन बळकावणे आणि जमिनींच्या व्यवहारांमध्ये अनियमितता झाल्याच्या तक्रारी सातत्याने सरकारकडे करण्यात आल्याचा दावा त्यांनी केला. स्थानिक नागरिक आणि पक्षाच्या कार्यकर्त्यांकडून विरोधी पक्षांना यासंदर्भातील माहिती मिळाल्याचे सांगत अनेक लोकांच्या जमिनी त्यांच्या ताब्यातून गेल्याचा आरोप त्यांनी केला.
तसेच अयोध्येतील जमीन संपादन, घरे पाडण्याच्या कारवाया आणि कथित अन्यायाच्या घटनांची माहिती नागरिकांनी द्यावी, असे आवाहन यादव यांनी केले. या सर्व प्रकरणांची नोंद करून ती सरकारसमोर मांडली जाईल, असे त्यांनी सांगितले.
भाजपला धर्मापेक्षा पैशांची अधिक चिंता असल्याचा आरोप करत यादव म्हणाले की, जनतेला विकास, समृद्धी, महागाईतून दिलासा आणि समाजात फूट पाडणाऱ्या राजकारणाचा अंत हवा आहे. मात्र सरकारचे लक्ष या मूलभूत प्रश्नांवर नसल्याची टीका त्यांनी केली.
