अमेरिका-इराण यांच्यातील शांतता कराराबाबतचा संभ्रम आणि जागतिक घडामोडींमुळे शुक्रवारी एका दिवसात सोनेचांदीच्या दरात मोठी घसरण झाली आहे. सोन्याचे दर 4000 तर चांदीचे दर 16500 रुपयांनी घसरले आहेत. त्याचा परिणाम सराफा बाजारावरही झाला असून आता खरेदी करणाऱ्यांसाठी सुवर्णसंधी आहे.
एकाच दिवसात सोने आणि चांदीच्या दरात मोठी घसरण झाली आहे. चांदी एकाच झटक्यात 16,600 ने घसरली आहे, तर सोन्याच्या दरातही मोठी घट झाली आहे. शुक्रवारी रात्री ११:३० वाजता वायदे बाजार (कमोडिटी मार्केट) बंद होईपर्यंत, चांदीच्या दरात १६,००० पेक्षा जास्त घट झाली होती, तर सोन्याच्या दरातही जवळपास ४,००० ची घसरण झाली.
एकाच दिवसात सोने आणि चांदीच्या दरात झालेली ही मोठी घसरण अमेरिकेतील घडामोडींमुळे झाली आहे. एमसीएक्स (MCX) वरील मोठ्या घसरणीनंतर, सराफा बाजारातही सोने आणि चांदीच्या दरात घट झाली. दिल्ली ते मुंबई दरम्यान सोने आणि चांदी स्वस्त झाले आहे.
मल्टी-कमोडिटी मार्केटमध्ये सोन्याचे दर ३,९४७ ने घसरून प्रति १० ग्रॅम १,५५,६०० वर बंद झाले, तर चांदीचे दर १६,५९५ ने घसरून प्रति किलो २,४८,२०१ वर आले. अमेरिका-इराणमधील तणाव आणि फेडरल रिझर्व्हकडून व्याजदर वाढीच्या शक्यतेमुळे सोने आणि चांदीच्या दरात ही घसरण झाली आहे. आंतरराष्ट्रीय बाजारात, स्पॉट गोल्ड जवळपास 1% ने घसरून प्रति औंस 4,530 च्या आसपास व्यवहार करत होते, तर स्पॉट सिल्व्हर जवळपास 2% ने घसरून प्रति औंस 77 च्या खाली व्यवहार करत होते.
आंतरराष्ट्रीय बाजारात सोन्याच्या दरात ३.४% घसरण झाली आहे. अमेरिकेतील अपेक्षेपेक्षा चांगल्या रोजगारविषयक आकडेवारीचा परिणाम बॉण्ड यील्ड्स आणि डॉलरवर झाला आहे. या दोन्हींमध्ये वाढ होत असून, त्यामुळे सोने आणि चांदीच्या दरात मोठी घसरण झाली आहे.
अमेरिकेची फेडरल रिझर्व्ह यावर्षी व्याजदर वाढवू शकते. याचे मुख्य कारण म्हणजे अमेरिका-इराण संघर्षामुळे कच्च्या तेलाच्या किमती वाढल्या असून, त्यामुळे महागाईचा धोका वाढला आहे. सोने आणि चांदीच्या दरातील घसरणीचे हे देखील एक प्रमुख कारण आहे.
तज्ज्ञांच्या मते फेडरल रिझर्व्ह या वर्षी डिसेंबरपर्यंत व्याजदरात २५ बेसिस पॉईंट्सची वाढ करू शकते. ऑक्टोबरमध्ये ६०% वाढ होण्याची व्यापाऱ्यांची अपेक्षा आहे. तथापि, जॉब डेटा जाहीर होण्यापूर्वी, किमान या वर्षी तरी व्याजदर वाढणार नाहीत अशी आशा होती. फेडच्या अधिकाऱ्यांची बैठक १६-१७ जून रोजी होणार आहे. या बैठकीचे अध्यक्षस्थान फेडचे नवनियुक्त अध्यक्ष केविन वॉर्श भूषवतील. या बैठकीनंतर निर्णय जाहीर केला जाईल. त्यामुळे बाजारात अनिश्चितता असल्याने सोने चांदीचे दर घसरत असल्याचे तज्ज्ञांनी सांगितले.
