जम्मू-काश्मीर पोलिसांनी सोमवारी दहशतवादी संघटना लष्कर-ए-तोयबाशी (LeT) कथितरीत्या संबंधित असलेल्या ओव्हरग्राउंड वर्कर (OGW) नेटवर्कचा पर्दाफाश केला. या प्रकरणात पोलिसांनी तिघांना अटक केली आहे. दहशतवाद्यांना मदत, सुरक्षित मार्ग आणि जमिनीवरून इतर प्रकारचे सहकार्य पुरविल्याचा आरोप त्यांच्यावर आहे.
पोलिस अधिकाऱ्यांच्या माहितीनुसार, अटक करण्यात आलेल्या आरोपींची नावे झाकीर हुसेन, मोहम्मद आझम आणि मोहम्मद मुस्ताक अशी आहेत. हे आरोपी दहशतवाद्यांना मार्गदर्शक म्हणून मदत करीत असल्याचा तसेच दहशतवादी गटांना काश्मीर खोऱ्याकडे जाण्यासाठी मार्ग उपलब्ध करून देत असल्याचा संशय आहे.
राजौरी पोलिसांच्या माहितीनुसार, या तिघांनी यापूर्वी झालेल्या अनेक हाय-प्रोफाइल दहशतवादी हल्ल्यांशी संबंधित दहशतवाद्यांना जमिनीवरून मदत केल्याचाही संशय आहे. यामध्ये नागरिकांना लक्ष्य करण्यात आलेल्या एका हल्ल्याचाही समावेश आहे.
दरम्यान, तपासादरम्यान एका आरोपीने दिलेल्या माहितीनुसार पोलिसांनी आयईडी (इम्प्रोव्हाइज्ड एक्सप्लोसिव्ह डिव्हाइस) जप्त केला आहे. पोलिस प्रवक्त्याने दिलेल्या माहितीनुसार, प्राथमिक तपासात हा आयईडी दहशतवादी गटातील सदस्यांनी आरोपींकडे सुरक्षित ठेवण्यासाठी दिल्याचे समोर आले आहे. तसेच भविष्यातील एखाद्या लक्ष्यित हल्ल्यासाठी त्याचा वापर करण्याची शक्यता असल्याचा पोलिसांचा संशय आहे.
या प्रकरणाचा तपास अद्याप सुरू असून, या नेटवर्कशी संबंधित इतर व्यक्तींची ओळख पटविणे, त्यांचे सहकारी शोधणे आणि अटक करण्यात आलेल्या आरोपींचा दहशतवादी कारवायांमधील नेमका सहभाग किती होता, याचा तपास पोलिसांकडून करण्यात येत आहे. तसेच या संपूर्ण नेटवर्कची व्याप्ती आणि त्यांना मिळणाऱ्या इतर प्रकारच्या मदतीचा शोध घेण्याचे काम सुरू असल्याचे पोलिसांनी सांगितले.
