लोकसभा निवडणुकीसाठी उभ्या असलेल्या उमेदवारांना 95 लाख रुपये खर्चाची मर्यादा निर्धारित करण्यात आली आहे. हा खर्च करत असताना प्रचाराच्या वेळी करण्यात येणाऱया खर्चाचे दरही ठरवून देण्यात आले आहेत. मुंबई शहर आणि उपनगरात एक प्लेट वडापावसाठी 15 रुपये दर निश्चित करण्यात आल्याने निवडणुकीत कार्यकर्त्यांना उमेदवाराचा प्रचार करताना वडापाववर मनसोक्त ताव मारता येणार आहे.
निवडणुकीत उमेदवारांनी प्रचाराच्या काळात चहा, नाश्ता, जेवण, गाडी तसेच सभेसाठी वापरण्यात येणाऱया खुर्च्या, नेत्यांसाठीच हॉटेल बुकिंग यावर करण्यात येणाऱया खर्चाचे दरपत्रक निवडणूक आयोगाकडून ठरवून देण्यात येते. मुंबई शहर व उपनगर जिह्यातील सहा मतदारसंघांत यासाठी सार्वजनिक बांधकाम विभागाकडून जे दर जिल्हा निवडणूक अधिकाऱयांना कळविण्यात आले होते त्यामध्ये मोठी तफावत असल्याचे दिसून आले होते.
मुंबईत सर्वसाधारणपणे कुठेही 15 रुपयाला मिळणाऱया वडापावसाठी 25 आणि 10 रुपयाला मिळणाऱया चहासाठी 20 रुपये दर ठरविण्यात आला होता. उपनगरापेक्षा मुंबई शहरात चहा, कॉफी, नाश्ता, शाकाहारी व मांसाहारी जेवण आदींवर करण्यात येणारा खर्च खूपच अधिक असल्याने उमेदवारांच्या खर्चाचा ताळमेळ कसा घालायचा असा प्रश्न निर्माण झाला होता. यामुळे मुंबईच्या जिल्हाधिकाऱयांकडून खर्चाचे सुधारित दरपत्रक जाहीर करण्यात आले आहे.
अर्ज दाखल केल्यापासून हिशोब
ज्या दिवशी जिल्हाधिकारी कार्यालयात उमेदवारी अर्ज भरला जातो, त्या दिवसापासून उमेदवाराला प्रत्येक दिवसाच्या प्रचारासाठी खर्चाची नोंद ठेवावी लागते. दररोज होणारा खर्च एका वहीत लिहून निवडणूक आयोगाला सादर करणे बंधनकारक आहे. निवडणूक खर्चावर देखरेख ठेवण्यासाठी नियुक्त करण्यात आलेल्या अधिकाऱयांकडून दर आठवडय़ाला खर्चाची तपासणी करण्यात येईल.
असे आहे खर्चाचे दरपत्रक
चहा ः 10 रुपये
कॉफी ः 12 रुपये
वडापाव ः 15 रुपये
नाष्टा ः 25 रुपये
पुरी-भाजी ः 60 रुपये
पुलाव ः 75 रुपये
शाकाहारी थाळी ः 110
मांसाहारी थाळी ः 140
वाहन व्यवस्था
(24 तास, 100 किमी)
नॉन एसी टॅक्सी ः 2770 रुपये
एसी टॅक्सी ः 2960 रुपये
इन्होव्हा एसी ः 5000 रुपये
पन्नास सीटर बस ः 11, 500
हॉटेल व्यवस्था (प्रतीदिन)
नॉन एसी रूम ः 1650
एसी रूम ः 3000
फोर स्टार हॉटेल ः 20,000
