राम मंदिर देणगी चोरी आणि दिलीत नीट पेपरफुटीच्या निषेधार्थ आंदोलन करणाऱ्या विद्यार्थ्यांवरील पोलीस कारवाई, या दोन मुद्द्यांवर पंतप्रधान नरेंद्र मोदी आणि केंद्रीय गृहमंत्री अमित शहा गप्प आहेत, असा आरोप काँग्रेस अध्यक्ष मल्लिकार्जुन खरगे यांनी सोमवारी केला. तसेच या प्रकरणांवर पंतप्रधान मोदींनी जनतेची माफी मागावी, अशी मागणी त्यांनी केली आहे.
दिलीत आयोजित पत्रकार परिषदेत विरोधकांच्या मागण्या पुन्हा नव्याने मांडताना खरगे यांनी सरकारसमोर तीन स्पष्ट मागण्या ठेवल्या. २० जुलै रोजी विद्यार्थी आंदोलकांवर झालेल्या कारवाईचा संदर्भ देत ते म्हणाले, “आमची पहिली मागणी आहे की, केंद्रीय गृहमंत्र्यांनी समोर येऊन हे सांगावे की विद्यार्थ्यांवर पेलेट गन, अश्रुधूर आणि लाठीमारचा वापर का करण्यात आला.”
त्यानंतर त्यांनी अयोध्येतील राम मंदिरात देणगीच्या चोरीच्या वादाकडे लक्ष वेधले आणि पंतप्रधानांच्या विश्वासू विश्वस्तांवर गंभीर आरोप केले. खरगे म्हणाले, “मोदीजींच्या विश्वासू विश्वस्तांनी राम मंदिरात चोरी केली. खुद्द पंतप्रधानांनीच याबद्दलची माहिती उघड करावी, अशी मागणी विरोधी पक्षांनी केली होती. मात्र अद्याप त्यावर काहीही कारवाई झालेली नाही.”
त्यांची तिसरी मागणी होती की, “या दोन्ही मुद्द्यांवर पंतप्रधानांनी जनतेची माफी मागावी.” ते पुढे म्हणाले, “गेल्या १५ दिवसांपासून पंतप्रधान आणि गृहमंत्री या प्रश्नांवर काहीही बोललेले नाहीत. आम्ही या सर्व मुद्द्यांवर लढा देत आहोत.”
