हिंदुस्थानचा कुस्तीपटू सुजीत कालकलने शुक्रवारी दमदार पुनरागमन करत सुवर्णपदकाला गवसणी घातली. सुजीतने अंतिम सामन्यात ताजिकिस्तानच्या अब्दुलमजीद कुदियेवला 10-9 ने पराभूत करून कुस्तीच्या सुवर्णपदकासाठी हिंदुस्थानची प्रतीक्षा संपवली. त्याने पुरुषांच्या 65 किलो फ्री स्टाइल गटात एका उल्लेखनीय पुनरागमनानंतर हा विजय मिळवला. 23 वर्षीय हिंदुस्थानी खेळाडू सामन्याच्या बहुतांश वेळेस 2-9 ने मागे होता, पण अंतिम क्षणांमध्ये सलग आठ गुण मिळवून त्याने जोरदार पुनरागमन केले आणि कुदियेवला पराभूत करून या आशियाई क्रीडा स्पर्धेतील हिंदुस्थानचे पहिले कुस्ती सुवर्णपदक निश्चित केले.
सुजीतचा हा विजय म्हणजे नागोयामधील त्याच्या प्रभावी कामगिरीचा कळस होता. अंतिम फेरीपर्यंतच्या प्रवासात त्याने एका ऑलिम्पिक चॅम्पियनला आणि इराण व जपानच्या बलाढय़ प्रतिस्पर्ध्यांना पराभूत केले होते. या हिंदुस्थानी कुस्तीपटूने अफगाणिस्तानच्या सय्यद ओमर झाझाईविरुद्ध आपल्या आव्हानाला सुरुवात केली आणि सुरुवातीला तो 0-3 ने मागे होता. त्यानंतर कलकलने पुश-आउट आणि शोल्डर थ्रोने गुण मिळवून सामन्याचे चित्र पालटले आणि 5-3 अशी आघाडी घेतली. त्यानंतर त्याने थ्रो आणि रोलने आणखी चार गुण मिळवून 13-3 असा तांत्रिक श्रेष्ठत्वाचा विजय निश्चित केला आणि उपांत्यपूर्व फेरीत प्रवेश केला.
