पाकिस्तानमधील ‘ब्रॉड पीक’वर झालेल्या हिमस्खलनात दोन गिर्यारोहकांचा मृत्यू झाल्याची पुष्टी झाली आहे. हिमस्खलनानंतर जगप्रसिद्ध नेपाळी गिर्यारोहक निर्मल पुर्जा यांच्या नेतृत्वाखालील 10 गिर्यारोहकांचा गट बेपत्ता झाल्याचे वृत्त होते. यापैकी दोन गिर्यारोहकांच्या मृत्यूची पुष्टी करण्यात आली आहे. नाधिरा अल-हार्थी आणि पुर बहादूर गुरुंग (उर्फ ‘युक्ता’) अशी मयत गिर्यारोहकांची नावे आहेत.
नाधिरा यांचा मृतदेह सापडला असून हेलिकॉप्टरद्वारे तो स्कर्दू येथे नेला जात आहे. युक्ता यांच्या मृतदेहाच्या वाहतुकीची व्यवस्थाही केली जात आहे, असे द अल्पाइन क्लब ऑफ पाकिस्तान शुक्रवारी एका निवेदनात म्हटले आहे. जे गिर्यारोहक अजूनही बेपत्ता आहेत, त्यांच्यासाठी शोध आणि बचाव कार्य सुरू असल्याचे क्लबने नमूद केले.
निर्मल पुर्जा (MBE) हे ‘एलीट एक्स्पेड’ (Elite Exped) या गिर्यारोहण कंपनीचे सह-संचालक आहेत. ही कंपनी जगातील सर्वोच्च शिखरांवर गिर्यारोहण मोहिमा आयोजित करते. निर्मल पुर्जा यांच्यासोबत मिंगमा डेव्हिड शेरपा आणि तेजान गुरुंग हे देखील या कंपनीचे नेतृत्व करतात. नेपाळमध्ये जन्मलेले आणि ‘निम्सदाई’ या नावाने लोकप्रिय असलेले निर्मल पुर्जा यांची लष्करी कारकीर्द अत्यंत प्रभावी राहिली आहे. गिर्यारोहणाच्या क्षेत्रात त्यांनी अनेक विक्रम प्रस्थापित केले असून, ते आता एक ऐतिहासिक व्यक्तिमत्त्व बनले आहेत.
स्थानिक गिर्यारोहण संस्थांच्या माहितीनुसार, निर्मल पुर्जा यांच्या नेतृत्वाखालील गिर्यारोहकांचा गट शिखर सर करण्यासाठी ‘कॅम्प 2’ आणि ‘कॅम्प 3’ दरम्यान जात असताना ही हिमस्खलनाची घटना घडली. या मोहिमेत निर्मल पुर्जा यांच्यासह नऊ गिर्यारोहक सहभागी होते आणि त्यांच्या सद्यस्थितीबद्दल अद्याप कोणतीही निश्चित माहिती मिळालेली नाही. स्थानिक वृत्तानुसार, गुरुवारी दुपारच्या सुमारास पाकिस्तानमधील काराकोरम पर्वतरांगेत हे हिमस्खलन झाले.
