LPG ग्राहकांसाठी महत्त्वाची बातमी समोर आली आहे. घरगुती गॅस कनेक्शनची आधार-आधारित e-KYC पूर्ण करण्याची अंतिम मुदत आता 31 ऑगस्ट 2026 करण्यात आली आहे. यापूर्वी ही मुदत 16 ऑगस्ट आणि त्यानंतर 23 ऑगस्टपर्यंत वाढवण्यात आली होती.
ग्राहकांना e-KYC पूर्ण करण्यासाठी आणखी काही दिवसांची मुदत देण्यात आली आहे. 31 ऑगस्टपर्यंत e-KYC पूर्ण न केल्यास LPG कनेक्शन तात्काळ रद्द होईल, असे नाही. मात्र, घरगुती दराने LPG सिलिंडर मिळण्यात अडचणी येऊ शकतात. सिलिंडर बुकिंग आणि डिलिव्हरी सेवांवरही परिणाम होण्याची शक्यता आहे. काही प्रकरणांत e-KYC पूर्ण होईपर्यंत सब्सिडी किंवा घरगुती दराचा लाभ मिळण्यात अडथळा येऊ शकतो.
LPG कनेक्शन खऱ्या ग्राहकाच्या नावावर आहे की नाही, हे निश्चित करणे आणि बनावट किंवा डुप्लिकेट कनेक्शनला आळा घालणे हा या प्रक्रियेचा उद्देश आहे. तसेच घरगुती वापरासाठी मिळणाऱ्या LPGचा गैरवापर आणि अनधिकृत व्यावसायिक वापर रोखण्यासाठीही ही प्रक्रिया महत्त्वाची आहे. ग्राहक आपल्या LPG कंपनीच्या अधिकृत मोबाइल अॅपद्वारे e-KYC करू शकतात. Indane ग्राहकांसाठी IndianOil ONE, Bharat Gas ग्राहकांसाठी Hello BPCL आणि HP Gas ग्राहकांसाठी HP Pay अॅप उपलब्ध आहे. आधार-आधारित फेस ऑथेंटिकेशनसाठी Aadhaar FaceRD अॅपचाही वापर करता येतो.
तांत्रिक अडचण असल्यास ग्राहक आपल्या LPG वितरकाकडे जाऊनही e-KYC पूर्ण करू शकतात. काही ठिकाणी सिलिंडर डिलिव्हरीच्या वेळी डिलिव्हरी कर्मचाऱ्यामार्फतही फेस स्कॅन करून e-KYC करण्याची सुविधा उपलब्ध आहे. त्यामुळे LPG ग्राहकांनी शेवटच्या दिवसाची वाट न पाहता 31 ऑगस्टपूर्वी e-KYC पूर्ण करून घेणे महत्त्वाचे आहे.
