उन्हाळा सुरू होताच, थंड आणि शांत ठिकाणी जाण्याची इच्छा होते. बहुतेक लोक मनाली आणि शिमलासारख्या प्रसिद्ध थंड हवेच्या ठिकाणी जातात, पण गर्दी, महागडी हॉटेल्स आणि वाहतूक कोंडीमुळे कंटाळा येतो. अशावेळी बजेट फ्रेंडली ठिकाण आणि दिसायलाही तितकेच सुंदर असेल तर आनंद अधिक वाढेल. अशीच कमी गर्दी असलेली ठिकाणे आपण शोधायला हवीत. जिथे आनंदही लुटता येईल आणि खिशालाही कात्री लागणार नाही.
तीर्थन व्हॅली – निसर्गप्रेमींसाठी एक स्वर्ग
गर्दीपासून दूर शांततेच्या शोधात असाल, तर तीर्थन व्हॅली हे एक योग्य ठिकाण आहे. वाहणारी नदी, हिरवीगार जंगले आणि स्वच्छ हवा तुम्हाला मोहित करेल. येथे ट्रेकिंग आणि मासेमारीसारखे उपक्रमही उपलब्ध आहेत. विशेष म्हणजे, निवास आणि जेवणाचा खर्च खूपच कमी आहे.
चोपटा – मिनी स्वित्झर्लंड
चोपटाला हिंदुस्थानचे मिनी स्वित्झर्लंड म्हटले जाते. येथील हिरवीगार वनराई आणि पर्वतांची दृश्ये मनमोहक आहेत. येथून तुंगनाथ मंदिराकडे ट्रेकिंगची सोयही उपलब्ध आहे. कमी बजेटमध्ये प्रवास करणाऱ्यांसाठी हे ठिकाण एक उत्तम पर्याय आहे.
लॅन्सडाउन – शांतता आणि साधेपणाचा संगम
शांत आणि कमी गर्दीचे ठिकाण हवे असेल, तर लॅन्सडाउनला नक्की भेट द्या. येथील हवामान थंड आहे आणि वातावरण खूप आरामदायी आहे. येथे तुम्ही एकामागोमाग एक उंच ठिकाणाहून नेत्रदीपक दृश्ये पाहू शकता.
झिरो व्हॅली – निसर्ग आणि संस्कृतीचा संगम
झिरो व्हॅली तिच्या सुंदर हिरवळीसाठी आणि आदिवासी संस्कृतीसाठी ओळखली जाते. येथील शांत वातावरण आणि अनोखा अनुभव तुम्हाला शहराच्या धावपळीपासून दूर घेऊन जातो.
येरकौड – दक्षिणेकडील एक लपलेले रत्न
तामिळनाडूतील हे छोटे हिल स्टेशन फारसे परिचित नाही. येथील तलाव, कॉफीचे मळे आणि थंडगार वारा तुम्हाला ताजेतवाने करेल. येथे राहण्याचा आणि प्रवासाचा खर्च दोन्हीही खूप किफायतशीर आहे.
उन्हाळ्यात एका नवीन आणि परवडणाऱ्या प्रवास योजनेच्या शोधात असाल, तर या थंड हवेच्या ठिकाणांचा विचार करा. येथे तुम्हाला शांतता, सौंदर्य आणि साहस यांचा एक अद्भुत संगम मिळेल, आणि तेही फार जास्त खर्च न करता.
