छत्तीसगडमधील नक्षलग्रस्त सुकमा जिल्ह्यात निकामी व जुनी स्फोटके नष्ट करत असताना झालेल्या अपघाती स्फोटात केंद्रीय राखीव पोलीस दलाचे (CRPF) चार जवान जखमी झाले आहेत. यापैकी दोघांची प्रकृती गंभीर असल्याची माहिती पोलिसांनी दिली आहे. भेजी पोलीस ठाण्याच्या हद्दीतील एलारमडगु सुरक्षा शिबिराजवळ गुरुवारी सायंकाळी ही दुर्घटना घडली.
मिळालेल्या माहितीनुसार, कोंटा रेंज अंतर्गत येणाऱ्या भागातील विविध शिबिरांची पाहणी करणे आणि तेथील निरुपयोगी तसेच शिल्लक राहिलेली स्फोटके सुरक्षितपणे निकामी करण्यासाठी सीआरपीएफच्या ५०व्या बटालियनचे ‘दारूगोळा तांत्रिक पथक’ जगदलपूरहून एलारमडगु शिबिरात पोहोचले होते.
हे पथक सुरक्षा शिबिरापासून सुमारे २०० मीटर अंतरावर असलेल्या बोडराजपदार नाल्याजवळ सर्व सुरक्षा नियमांचे पालन करत स्फोटके निकामी करण्याचे काम करत होते. मात्र, त्याच वेळी स्फोटकाचा एक तुकडा अचानक उडून जवळच पडला आणि त्याचा जोरदार स्फोट झाला, अशी माहिती एका वरिष्ठ अधिकाऱ्याने दिली.
या अपघाती स्फोटात सुरक्षितता आणि विल्हेवाटीच्या कामासाठी तैनात असलेले चार जवान जखमी झाले. जखमींमध्ये ATT पथकाचे सदस्य असलेले सहाय्यक पोलीस उपनिरीक्षक (ASI) एम. के. तिवारी आणि निरीक्षक अमरनाथ मिश्रा, तसेच ५०व्या बटालियनचे एएसआय अनिस खान आणि हेड कॉन्स्टेबल कुलदीप राज यांचा समावेश आहे. यापैकी दोन्ही एएसआय गंभीर जखमी झाले आहेत.
स्फोटानंतर तात्काळ जखमी जवानांवर प्रथमोपचार करून त्यांना उपचारासाठी कोंटा येथील शासकीय रुग्णालयात दाखल करण्यात आले. गंभीर जखमी असलेल्या जवानांना पुढील प्रगत उपचारांसाठी इतर मोठ्या रुग्णालयात हलवण्याची व्यवस्था केली जात असल्याचे अधिकाऱ्यांनी सांगितले.
